മനാമ: ബഹ്‌റൈന്‍ പ്രവാസികളായ മലയാളി ദമ്പതികളുടെ മൂന്നു വയസ്സുള്ള ആണ്‍കുട്ടി പനി ബാധിച്ചു മരിച്ചു. കണ്ണൂര്‍ ഇരിട്ടി സ്വദേശിയായ ബ്ലസന്‍ മാത്യുവിന്റെയും അനിതാ ബ്ലസന്‍ മാത്യുവിന്റെയും രണ്ടാമത്തെ മകനായ ഡിലന്‍ ബ്ലസന്‍ മാത്യു (3) ആണ് ശനിയാഴ്ച ഉച്ചയോടെ സല്‍മാനിയാ ആശുപത്രിയില്‍ മരിച്ചത്.

നാല് ദിവസം മുന്‍പ് പനിയും തൊണ്ട വേദനയും ആയതിനെ തുടര്‍ന്ന് ആശുപത്രിയില്‍ പ്രവേശിച്ചിരുന്നു. തുടര്‍ന്ന് അസുഖം ഭേദപ്പെട്ടെങ്കിലും വെള്ളിയാഴ്ച രാത്രിയോടെ കുട്ടിക്ക് വീണ്ടും ചുമ വരികയും അസ്വസ്ഥത പ്രകടിപ്പിക്കുകയും ചെയ്തിരുന്നതായി ബന്ധുക്കള്‍ അറിയിച്ചു. ഉടനെ സല്‍മാനിയ ആശുപത്രിയില്‍ പ്രവേശിപ്പിച്ചെങ്കിലും ശനിയാഴ്ച ഉച്ചയോടെ രോഗം മൂര്‍ച്ഛിച്ച് ആശുപത്രിയില്‍ വെച്ചു തന്നെ മരണം സംഭവിക്കുകയായിരുന്നു.

ബഹ്‌റൈനില്‍ ഖാലിദ് ട്രാന്‍സ്‌പോര്‍ട്ട് കമ്പനിയില്‍ ജോലി ചെയ്തു വരുന്ന പിതാവ് ബ്ലസന്‍ 8 വര്‍ഷമായി ബഹ്‌റൈനിലുണ്ടെങ്കിലും ഇപ്പോള്‍ മൂത്ത മകനോടൊപ്പം നാട്ടില്‍ പോയിരിക്കുകയാണ്. ഭാര്യ അനിത മാത്രമാണ് ഇപ്പോള്‍ ബഹറൈനിലുള്ളത്. കുട്ടിയുടെ മൃതദേഹം നാട്ടിലേയ്ക്ക് കൊണ്ടുപോകാനുള്ള നടപടിക്രമങ്ങള്‍ പുരോഗമിക്കുന്നതായി ബന്ധപ്പെട്ടവര്‍ അറിയിച്ചു.