ദുബൈ: യുഎഇയിലെ പ്രധാന ഗൃഹാലങ്കാര, ഗൃഹോല്‍പന്ന  സ്ഥാപനമായ ഡാന്യൂബ് ഹോം തങ്ങളുടെ ഏറ്റവും കമനീയവും സ്‌റ്റൈലിഷുമായ ഡിസൈന്‍ ശേഖരം അവതരിപ്പിച്ചു. എഫ്ടിവിയുമായി ചേര്‍ന്ന് നടത്തിയ ഇവന്റില്‍ ശ്രദ്ധേയമായ പുതിയ ഉല്‍പന്ന ശ്രേണിയാണ് അവതരിപ്പിച്ചത്. എംവി അല്‍മസ്‌രിയുടെയും ഇലാഞ്ച് കൂച്ചറിന്റെയും ഡിസൈനുകള്‍ പ്രത്യേക പരിപാടിയില്‍ അണിനിരന്നു. അല്‍ബര്‍ഷ ഡാന്യൂബ് ഹോം ഷോറൂമില്‍ നടന്ന പ്രൗഢ ചടങ്ങില്‍ ഡാന്യൂബ് ഗ്രൂപ് ഡയറക്ടര്‍ ആദില്‍ സാജന്‍, എഫ്ടിവി സിഇഒ മാക്‌സിമിലിയന്‍ ഡെന്നിസ് എഡല്‍വീസ്, ഡാന്യൂബ് ഹോം ഡയറക്ടര്‍ സയ്യിദ് ഹബീബ് എന്നിവര്‍ പങ്കെടുത്തു.

എഫ്ടിവിയുമായുള്ള പങ്കാളിത്തം നവീകരണത്തിനും മികവിനുമുള്ള തങ്ങളുടെ പ്രതിബദ്ധതയുടെ തെളിവാണെന്ന് ആദില്‍ സാജന്‍ പറഞ്ഞു. ഈ ബ്രാന്‍ഡഡ് ശേഖരം തങ്ങളുടെ ഉപയോക്താക്കള്‍ക്ക് എത്തിക്കുന്നതില്‍ അഭിമാനിക്കുന്നുവെന്നും, ഇതിന്റെ പ്രത്യേകത ആളുകള്‍ വീടിന്റെ അലങ്കാരം വീക്ഷിക്കുന്ന രീതിയെ പുനര്‍നിര്‍വചിക്കുമെന്ന് വിശ്വസിക്കുന്നതായും അദ്ദേഹം അഭിപ്രായപ്പെട്ടു. കമനീയതയില്‍ വിട്ടുവീഴ്ച ചെയ്യാതെ വ്യക്തിഗത ശൈലി പ്രതിഫലിപ്പിക്കുന്ന, സുഖകരായ കാഴ്ച സുഖം പകരുന്നതാണിതെന്നും അദ്ദേഹം വ്യക്തമാക്കി.
ഈ ശേഖരം യാഥാര്‍ത്ഥ്യമാക്കിയ ഉല്‍പന്ന മേധാവികളെയും ഡിസൈനര്‍മാരെയും അഭിനന്ദിക്കുന്നുവെന്ന് സയ്യിദ് ഹബീബ് പറഞ്ഞു.
സ്‌റ്റൈലിഷായ ഈ ശേഖരത്തിലെ ഇനങ്ങള്‍ ശില്‍പാകൃതികളോട് കൂടിയതും ആഡംബരപൂര്‍ണമായ വിശദാംശങ്ങള്‍ ഉള്‍ക്കൊള്ളുന്നതാണ്.  ഏത് ഇന്റീരിയറിനും സമകാലികവും അത്യാധുനികവുമായ എഫക്ട് നല്‍കുന്ന ബോള്‍ഡ് ടെക്‌സ്ചറുകള്‍ ഉള്‍ക്കൊള്ളുന്നതുമാണിതെന്നും അദ്ദേഹം കൂട്ടിച്ചേര്‍ത്തു.