തിരുവനന്തപുരം: നാര്‍കോട്ടിക് ജിഹാദ് വിവാദ പരാമര്‍ശം മുതലെടുത്ത് വര്‍ഗീയത ആളിക്കത്തിക്കാനാണ് ബി.ജെ.പി ശ്രമിക്കുന്നതെന്ന് കോണ്‍ഗ്രസ് നേതാവ് രമേശ് ചെന്നിത്തല. അവര്‍ കലക്കവെള്ളത്തില്‍ മീന്‍ പിടിക്കാന്‍ ശ്രമിക്കുകയാണ്. മതേതരത്വത്തിന് പേരുകേട്ട കേരളത്തില്‍ വര്‍ഗീയത ആളിക്കത്തിക്കാനാണ് ശ്രമം. ഇതിനെ ഗൗരവത്തില്‍ കാണണമെന്നും ചെന്നിത്തല കൂട്ടിച്ചേര്‍ത്തു.

ഈ വിഷയത്തില്‍ ഗവര്‍ണര്‍ പദവിയിലിരിക്കുന്ന ശ്രീധരന്‍പിള്ള അഭിപ്രായം പറയാന്‍ പാടില്ലായിരുന്നുവെന്നും ചെന്നിത്തല പറഞ്ഞു. ഗവര്‍ണര്‍ പദവിക്ക് ഒരു ഔന്നിത്യമുണ്ട്. വര്‍ഗീയ പരാമര്‍ശങ്ങള്‍ നടത്തുന്നതില്‍നിന്ന് വിട്ടുനില്‍ക്കണം.

ഗോള്‍വാര്‍ക്കറുടെ പുസ്തകം പഠിപ്പിക്കാന്‍ താല്‍പര്യമുള്ള പിണറായി വിജയന്റെ വൈസ്ചാന്‍സിലറാണ് കേരളത്തിലുള്ളത്. ഏത് ആശയം പഠിക്കുന്നതിലും തെറ്റില്ല. പക്ഷേ, കുട്ടികള്‍ക്ക് ഗാന്ധിയെയും നെഹ്‌റുവിനെയും പഠിപ്പിക്കാതെ ഗോള്‍വാര്‍ക്കറിനെ മാത്രം പഠിച്ചാല്‍ മതിയെന്ന് പറയുന്ന അക്കാദമിക് സമിതികള്‍ ആരുടെ താല്‍പര്യമാണ് സംരക്ഷിക്കുന്നതെന്ന് വ്യക്തമാക്കണമെന്നും ചെന്നിത്തല വ്യക്തമാക്കി.
കഴിഞ്ഞ ദിവസം വിഷയത്തില്‍ കേന്ദ്ര ആഭ്യന്തരമന്ത്രിക്ക് ബി.ജെ.പി കത്തയച്ചിരുന്നു. ബിഷപ്പിനെ പിന്തുണച്ചും സുരക്ഷയൊരുക്കാനുമായിരുന്നു കത്ത്. ഇന്നലെയും ഇന്നും ബി.ജെ.പി സംസ്ഥാന അധ്യക്ഷന്‍ കെ.സുരേന്ദ്രനും ഇതേ നീക്കമാണ് നടത്തിയത്.