ശാസ്താംകോട്ട: മദ്യപിച്ചു സ്വകാര്യ ബസ് ഓടിച്ച ഡ്രൈവറെ വാഹനപരിശോധനയ്ക്കിടയില്‍ കസ്റ്റഡിയിലെടുത്ത മോട്ടോര്‍ വെഹിക്കിള്‍ ഇന്‍സ്‌പെക്ടര്‍ ഒടുവില്‍ വാഹനത്തിന്റെ ഡ്രൈവറായി. ചക്കുവള്ളി കെ.സി.ടി ജങ്ഷനില്‍ വാഹനപരിശോധനക്കിടെയാണ് ഇന്നലെ വൈകിട്ട് കരുനാഗപ്പള്ളി-പുതിയകാവ്-ഭരണിക്കാവ് റൂട്ടിലോടുന്ന സ്വകാര്യബസിലെ ഡ്രൈവര്‍ കരുനാഗപ്പള്ളി സ്വദേശി രാംകുമാര്‍ പിടിയിലായത്. വാഹനം പരിശോധിച്ചപ്പോള്‍ തന്നെ മോട്ടോര്‍ വെഹിക്കിള്‍ ഇന്‍സ്‌പെക്ടര്‍ എം.ജി മനോജ് ഡ്രൈവര്‍ മദ്യപിച്ചിരുന്നതായി കണ്ടെത്തി. തുടര്‍ന്ന് ബസും ഡ്രൈവറെയും കസ്റ്റഡിയിലെടുത്ത ഇന്‍സ്‌പെക്ടര്‍ ബസിന്റെ വളയം തിരിച്ച് യാത്രക്കാരെ സുരഷിതരായി കരുനാഗപ്പള്ളിയിലെത്തിച്ചു. ഡ്രൈവറെ താലൂക്ക് ആശുപത്രിയില്‍ വൈദ്യപരിശോധനക്കു വിധേയാമാക്കിയപ്പോള്‍ മദ്യപിച്ചതായി തെളിഞ്ഞു. ഇയാളുടെ ലൈസന്‍സ് സസ്‌പെന്‍ഡു ചെയ്തു.