ഡല്‍ഹിയില്‍ നവംബര്‍ 20 നും 21 നും കൃത്രിമമഴ?; വായുമലിനീകരണം നേരിടാന്‍ ഐ.ഐ.ടി സംഘവുമായി ചര്‍ച്ച നടത്തി സര്‍ക്കാര്‍

ന്യൂഡല്‍ഹി: വായു മലിനീകരണം അതി രൂക്ഷമായി തുടരുന്ന സാഹചര്യത്തില്‍ കൃത്രിമ മഴ പെയ്യിക്കാനുള്ള സാധ്യതകള്‍ തേടി ഡല്‍ഹി സര്‍ക്കാര്‍. നവംബര്‍ 20-21 തിയ്യതികളില്‍ കൃത്രിമമഴ പെയ്യിക്കുന്ന കാര്യമാണ് പരിഗണിക്കുന്നത്. കാന്‍പൂര്‍ ഐ.ഐ.ടിയുടെ സഹകരണത്തോടെയാണ് ഇതിനായുള്ള ശ്രമങ്ങള്‍ പുരോഗമിക്കുന്നത്. ഡല്‍ഹി പരിസ്ഥിതി മന്ത്രി ഗോപാല്‍ റായ്, ധനമന്ത്രി അതിഷി എന്നിവര്‍ ഐഐടി സംഘവുമായി ചര്‍ച്ച നടത്തി.

അന്തരീക്ഷ മലിനീകരണ പ്രശ്‌നം ചര്‍ച്ച ചെയ്യാന്‍ പരിസ്ഥിതി മന്ത്രി ഉച്ചയ്ക്ക് 12.30ന് ഡല്‍ഹിയിലെ എല്ലാ മന്ത്രിമാരുടെയും യോഗം വിളിച്ചിട്ടുണ്ട്. കൃത്രിമ മഴയിലൂടെ അന്തരീക്ഷത്തിലെ പൊടിയും പുകയും ഇല്ലാതാക്കി വായു ശുദ്ധമാക്കാന്‍ കഴിയുമെന്നാണ് പ്രതീക്ഷ.

തലസ്ഥാനത്തെ വായു ഗുണനിലവാര സൂചിക തുടര്‍ച്ചയായ ഏഴാമത്തെ ദിവസവും 'ഗുരുതര' വിഭാഗത്തില്‍ തന്നെ തുടരുകയാണ്. ഇന്നലെ വൈകിട്ട് നാലിന് ശരാശരി വായു ഗുണനിലവാര സൂചിക 426 രേഖപ്പെടുത്തി. ഗാസിയാബാദ്, ഗുരുഗ്രാം, നോയിഡ, ഫരീദാബാദ് ഉള്‍പ്പെടെയുള്ള സ്ഥലങ്ങളിലാണ് വലിയ തോതില്‍ വായു മലിനീകരണമുള്ളത്. നഗരത്തില്‍ പുകമഞ്ഞ് മൂടി നില്‍ക്കുന്നുണ്ട്. അനുവദനീയമായതിന്റെ മൂന്നിരട്ടി മലിനീകരണ തോത് ഉയരുന്നതായി സര്‍ക്കാര്‍ വൃത്തങ്ങള്‍ വ്യക്തമാക്കി. സാഹചര്യം ഗുരുതരമായി തുടരുന്നതിനാല്‍ ഡല്‍ഹിയിലെ സ്‌കൂളുകള്‍ക്കുള്ള ശൈത്യകാല അവധി നേരത്തെയാക്കി. ഇന്ന് മുതല്‍ ഈ മാസം 18 വരെയാണ് അവധി.