എസ്.യു.വി കാറുകള്‍ക്ക് ഇന്ത്യന്‍ മാര്‍ക്കറ്റില്‍ വലിയ ഡിമാന്‍ഡാണുള്ളത്. ഇതിനാല്‍ തന്നെ മഹീന്ദ്രക്ക് ഈ നവംബര്‍ 1 വരെയുള്ള കണക്കുകള്‍ പ്രകാരം 2.86ലക്ഷം കാറുകളുടെ ബുക്കിങുകള്‍ തീര്‍പ്പാക്കാനുണ്ട് എന്നാണ് പുറത്ത് വരുന്ന റിപ്പോര്‍ട്ടുകള്‍. ഓരോ മാസവും അമ്പതിനായിരത്തിലേറെ ബുക്കിങ്ങുകളാണ് കമ്പനിക്ക് ലഭിച്ച് കൊണ്ടിരിക്കുന്നത്. മഹീന്ദ്രയുടെ എസ്.യു.വി വാഹനങ്ങളുടെ ബുക്കിങ് ക്യാന്‍സലേഷന്‍ നിരക്ക് വെറും എട്ട് ശതമാനം മാത്രമാണ്.

കാത്തിരിപ്പ് കാലയളവ് കുറക്കാനായി കമ്പനി അടുത്ത കാലത്തായി XUV700, സ്‌കോര്‍പിയോ, ഥാര്‍ എന്നിങ്ങനെ സുപ്രധന മോഡലുകളുടെ ഉല്‍പാദനം കൂട്ടിയിരുന്നു. മഹീന്ദ്രയുടെ തീര്‍പ്പാക്കാനുള്ള ഓര്‍ഡര്‍ ലിസ്റ്റ് പരിശോധിക്കുമ്പോള്‍ സ്‌കോര്‍പിയോക്കാണ് വമ്പന്‍ കാത്തിരിപ്പ്. സ്‌കോര്‍പിയോ N, ക്ലാസിക് എന്നീ മോഡലുകള്‍ ചേര്‍ത്ത് എസ്‌യുവിയുടെ 1.19 ലക്ഷം ഓര്‍ഡറുകളാണ് ഇനിയും തീര്‍പ്പാക്കാനുള്ളത്. ഥാറിന്റെ 76,000 യൂണിറ്റുകളും XUV700യുടെ 70,000 യൂണിറ്റുകളും കൊടുത്തു തീര്‍ക്കാനുണ്ട്. മഹീന്ദ്രയുടെ ഫ്‌ലാഗ്ഷിപ്പ് എസ്‌യുവിയായ XUV700 ഓരോ മാസവും 8,000 യൂണിറ്റ് ബുക്കിംഗുകളാണ് നേടിയെടുക്കുന്നത്.

RWD പതിപ്പ് കൊണ്ടുവന്നതോടെ ഥാറിന്റെ വില്‍പ്പനയും കുത്തനെ കൂടി. 15 മാസത്തിലധികമാണ് മഹീന്ദ്ര ഥാറിന്റെ കാത്തിരിപ്പ് കാലയളവ്. XUV300, XUV400 എന്നിവയുടെ 10,000 യൂണിറ്റ് വീതവും ബൊലേറോയുടെ 11,000 യൂണിറ്റും ഇനിയും ഡെലിവറി ചെയ്യാനുണ്ടെന്നാണ് കണക്കുകള്‍.നിലവില്‍ ഓരോമാസവും 39,000 യൂണിറ്റ് കാറുകള്‍ മഹീന്ദ്ര അധികമായി ഉത്പാദിപ്പിക്കുന്നുണ്ട്.2024ല്‍ ഇത് 49,000 ആയി ഉയര്‍ത്താനാണ് കമ്പനിയുടെ തീരുമാനം. ഇതോടെ ബുക്കിങ് നല്‍കിയിരിക്കുന്ന കാറുകള്‍ ഉപഭോക്താക്കളുടെ കയ്യിലേക്ക് വേഗത്തില്‍ എത്തിക്കാന്‍ മഹീന്ദ്രക്ക് സാധിച്ചേക്കും.

Content Highlights:mahindra notches 51000 monthly bookings has 2.86 lakh order