കണ്ണൂര്‍: സംസ്ഥാന കോണ്‍ഗ്രസ് നേതൃത്വത്തിനെതിരെ രൂക്ഷവിമര്‍ശനവുമായി യൂത്ത് കോണ്‍ഗ്രസ് ചിന്തന്‍ ശിബിരില്‍ പ്രമേയം. വി.ഡി സതീശനും കെ.സി വേണുഗോപാലിനും പരോക്ഷ വിമര്‍ശനമാണ് സമ്മേളനം ഉന്നയിച്ചത്. കണ്ണൂര്‍ ജില്ലാ ചിന്തന്‍ ശിവിറില്‍ അവതരിപ്പിച്ച സംഘടനാ പ്രമേയത്തിലായിരുന്നു നേതൃത്വത്തിനെതിരെ വിമര്‍ശനം.

'ചില നേതാക്കള്‍ക്ക് നേതൃത്വം ഭ്രഷ്ട് കല്‍പ്പിക്കുന്നത് ആത്മഹത്യ പരമാണ്. ചിലരുടെ താന്‍ പോരിമയാണ് ഇതിലൂടെ വ്യക്തമാകുന്നത്. അത്തരം ഭ്രഷ്ട് കൊണ്ട് ഇല്ലാതാകുന്ന ജനപിന്തുണയല്ല അവര്‍ക്കുള്ളത്. കോണ്‍ഗ്രസിന്റെ കീഴിലുള്ള സഹകരണ സ്ഥാപനങ്ങളില്‍ പണം വാങ്ങി മറ്റ് പാര്‍ട്ടിക്കാരെ നിയമിക്കുന്നു'.അത്തരം നേതാക്കളെ പരസ്യമായി കരണത്ത് അടിക്കണം തുടങ്ങിയ വിമര്‍ശനങ്ങളും സംഘടനാ പ്രമേയത്തില്‍ ഉയര്‍ന്നു.

'സ്വന്തം ബൂത്തില്‍ പോലും ഇടപെടല്‍ നടത്താതെ അഖിലേന്ത്യാ തലത്തില്‍ പൂമ്പാറ്റയായി മാറുന്ന നേതാക്കള്‍ പാര്‍ട്ടിയുടെ ശാപമാണ്. സമര മുഖങ്ങളിലെ ആവേശം ക്യാമറ ആഗിളുകള്‍ക്ക് അനുസരിച്ചാവുന്നത് ലജ്ജാകരമാണ്. ചാനല്‍ ക്യാമറകള്‍ക്ക് മുന്നിലെ നേതാക്കളുടെ വണ്‍ മാന്‍ ഷോ അവസാനിപ്പിക്കണം'. യുവ നേതാക്കള്‍ വളര്‍ന്നു വരരുതെന്ന് കരുതുന്ന മാടമ്പി സ്വഭാവമുള്ള ചില നേതാക്കള്‍ പാര്‍ട്ടിയിലുണ്ടന്നും സംഘടനാ പ്രമേയത്തില്‍ പറയുന്നു.

വിദ്യാര്‍ഥിയുവജന പ്രസ്ഥാനങ്ങളെ രാഷ്ട്രീയ വന്ധ്യംകരണത്തിന് വിധേയമാക്കുന്ന നടപടിയാണ് നേതൃത്വത്തിന്റെ ഭാഗത്ത് നിന്നുണ്ടാകുന്നത്. പുനഃസംഘടന അടക്കമുള്ളവ ഏറെ കാലമായി ഇല്ലാത്തത് രാഷ്ട്രീയ വന്ധ്യംകരണത്തിന്റെ ഭാഗമാണ്. തെരഞ്ഞെടുപ്പ് തോല്‍വിയില്‍ നിന്ന് പാഠം പഠിക്കാന്‍ നേതാക്കള്‍ തയാറാകുന്നില്ല.

സഹകരണ സ്ഥാപനങ്ങളുടെ നേതൃത്വത്തില്‍ ചില കാരണവന്മാര്‍ കുടിയിരിക്കുകയാണ്. കോണ്‍ഗ്രസ് ഭരിക്കുന്ന സഹകരണ സ്ഥാപനത്തിന്റെ തലപ്പത്ത് ഒരു നേതാവ് വന്നാല്‍ അദ്ദേഹം മരിക്കുന്നത് വരെ ആ പദവിയില്‍ തുടരുന്ന പ്രവണതയുണ്ട്. ഇത് അംഗീകരിക്കാനാവില്ല.

കോണ്‍ഗ്രസിന്റെ കീഴിലുള്ള സഹകരണ സ്ഥാപനങ്ങളില്‍ പണം വാങ്ങി മറ്റ് പാര്‍ട്ടിക്കാരെ നിയമിക്കുന്നു. അത്തരം നേതാക്കള്‍ക്ക് കരണക്കുറ്റിക്ക് അടിയാണ് യൂത്ത് കോണ്‍ഗ്രസ് നല്‍കേണ്ടതെന്നും സംഘടനാ പ്രമേയത്തില്‍ പറയുന്നു.