ബാറ്ററി ലൈഫ് സപ്പോര്‍ട്ടിന് ഐഫോണിനെ സഹായിക്കാന്‍ സാംസങ്

ഐഫോണുകള്‍ ഉപയോഗിക്കുന്നവര്‍ നേരിടുന്ന പ്രധാന പ്രശ്‌നം ബാറ്ററി ചാര്‍ജുമായി ബന്ധപ്പെട്ടാണ്. ആന്‍ഡ്രോയിഡ് ഫോണുകളെ അപേക്ഷിച്ച് ഐഫോണുകള്‍ക്ക് ബാറ്ററി ലൈഫ് നന്നെ കുറവാണ്. ഈ പ്രശ്‌നം വൈകാതെ തന്നെ പരിഹരിക്കപ്പെടും. ഇനി വരാന്‍ പോകുന്ന ഐഫോണുകള്‍ക്ക് കൂടുതല്‍ ബാറ്ററി ലൈഫ് ലഭിക്കും. ഇതിന് കാരണം ആപ്പിളിന്റെ സാങ്കേതികവിദ്യയല്ല എന്നതാണ് ശ്രദ്ധേയമായ കാര്യം. സാംസങ് ആണ് ഐഫോണുകള്‍ക്ക് കൂടുതല്‍ ബാറ്ററി ലൈഫ് ലഭിക്കാന്‍ കാരണമാകുന്നത്. എങ്ങനെയെന്ന് നോക്കാം.

കൊറിയന്‍ ടെക് കമ്പനിയായ സാംസങ് ആണ് ആപ്പിളിനായി ഒഎല്‍ഇഡി പാനലുകള്‍ നിര്‍മ്മിച്ച് നല്‍കുന്നത്. ഇപ്പോള്‍ സാംസങ് പുതിയ തരം ഒഎല്‍ഇഡി പാനലുകള്‍ നിര്‍മ്മിക്കാനുള്ള പ്രവര്‍ത്തനങ്ങളിലാണ്. ഇത് ഭാവിയിലെ ഐഫോണുകള്‍ക്ക് മികച്ച ബാറ്ററി ലൈഫ് നല്‍കുമെന്നാണ് പ്രതീക്ഷിക്കുന്നത്. ഒഎല്‍ഇഡി ഉത്പാദനത്തില്‍ സാംസങ് ഒരു പുതിയ മെറ്റീരിയലില്‍ ഉപയോഗിക്കാന്‍ പദ്ധതിയിടുന്നതായി ചില റിപ്പോര്‍ട്ടുകള്‍ സൂചിപ്പിക്കുന്നു. ഇവ വൈദ്യുതി ഉപയോഗം കുറയ്ക്കുന്ന രീതിയിലുള്ളവയായിരിക്കും.

2026ല്‍ ആയിരിക്കും സാംസങ് പുതിയ സാങ്കേതികവിദ്യ ഉപയോഗിച്ചുള്ള ഒലെഡ് പാനലുകള്‍ നിര്‍മ്മിക്കുക എന്നാണ് റിപ്പോര്‍ട്ടുകള്‍ നല്‍കുന്ന സൂചന. ഇത് 2026ല്‍ ആയിരിക്കും പുറത്തിറക്കുന്നത്. സാംസങ്ങിന്റെ പുതിയ ഒഎല്‍ഇഡി പാനലുമായി വരുന്ന അടുത്ത ആപ്പിള്‍ ഡിവൈസായി ഐഫോണ്‍ 18 മാറിയേക്കും. യുബിഐ റിസര്‍ച്ച് ഡെപ്യൂട്ടി ഡയറക്ടര്‍ ഡേജിയോങ് യൂന്‍ ആണ് സാംസങ്ങിന്റെ ഗ്രാന്‍ഡ് ഒഎല്‍ഇഡി പ്ലാനുകളുമായി ബന്ധപ്പെട്ട വിവരങ്ങള്‍ പുറത്ത് വിട്ടത് എന്ന് ദി ഇലക് റിപ്പോര്‍ട്ട് ചെയ്തു.

ബ്ലൂ ഫോസ്‌ഫോറസെന്റ്

സാംസങ് അതിന്റെ ഡിസ്‌പ്ലേ ഡിവിഷനില്‍ ഒഎല്‍ഇഡി പാനലുകളില്‍ ലൈറ്റ് പ്രൊഡക്ഷന്‍ സൂപ്പര്‍ചാര്‍ജ് ചെയ്യുന്നതിനായി ബ്ലൂ ഫോസ്‌ഫോറസെന്റ് മെറ്റീരിയലുകള്‍ ഉണ്ടാക്കുന്ന തിരക്കിലാണ്. സിയോളില്‍ നടന്ന എച്ച്2 2023 യുബിഐ റിസര്‍ച്ച് അനലിസ്റ്റ് സെമിനാറിനിടെയാണ് ഡേജിയോങ് യൂന്‍ ഇക്കാര്യം വെളിപ്പെടുത്തിയിരിക്കുന്നത്. ഈ പുതിയ നീല ഫോസ്‌ഫോറസെന്റ് മെറ്റീരിയലുകള്‍ ബി 1 എന്ന ഘടക ഗണത്തിലുള്ളവയാണ്. സാംസങ് ഡിസ്‌പ്ലേയുടെ നിലവിലുള്ള ലൈനപ്പ് ചുവപ്പും പച്ചയും ഫോസ്ഫറസ് പദാര്‍ത്ഥങ്ങളിലാണുള്ളത്.