തിരുവനന്തപുരം: വൈദ്യുതി റഗുലേറ്ററി കമ്മിഷന്റെ താരിഫ് നയത്തിനെതിരെ കെ.എസ്.ഇ.ബി. കഴിഞ്ഞദിവസം ചേര്‍ന്ന റഗുലേറ്ററി കമ്മിഷന്‍ സിറ്റിങ്ങിലാണ് വൈദ്യുതിബോര്‍ഡും ജീവനക്കാരുടെ സംഘടനകളും നയത്തെ ശക്തമായി എതിര്‍ത്തത്.
സംസ്ഥാന വൈദ്യുതി റഗുലേറ്ററി കമ്മിഷന്‍ പുറത്തിറക്കിയ കരട് താരിഫ് നയവും അനുബന്ധ വ്യവസ്ഥയുമാണ് വിവാദമായത്. വിതരണ ശൃംഖലയില്‍ സ്വകാര്യ കമ്പനികള്‍ക്കടക്കം അനുമതി നല്‍കാമെന്നും കെ.എസ്.ഇ.ബിക്കും സ്വകാര്യ കമ്പനികള്‍ക്കും വ്യത്യസ്ത നിരക്ക് ഈടാക്കാമെന്നുമാണ് പ്രധാന വ്യവസ്ഥ. നയത്തിലെ പല വ്യവസ്ഥകളും നടപ്പിലായാല്‍ കെ.എസ്.ഇ.ബിക്ക് 100 കോടിയോളം വരുമാന നഷ്ടമുണ്ടാകുമെന്നാണ് ബോര്‍ഡ് പറയുന്നത്. അധികമുള്ള വൈദ്യുതി, പവര്‍ എക്‌സ്‌ചേഞ്ച് റേറ്റില്‍ വന്‍കിട ഉപഭോക്താക്കള്‍ക്ക് നല്‍കാനും താരിഫ് നയത്തില്‍ വ്യവസ്ഥയുണ്ട്. ഉയര്‍ന്ന നിരക്കില്‍ വന്‍കിട ഉപഭോക്താക്കള്‍ക്ക് വൈദ്യുതി നല്‍കുന്നതിലെ ലാഭമാണ് ഗാര്‍ഹിക ഉപഭോക്താക്കള്‍ക്ക് കെ.എസ്.ഇ.ബി സബ്‌സിഡിയായി നല്‍കുന്നത്. ഇത് നിലയ്ക്കുന്നതോടെ ഗാര്‍ഹിക നിരക്ക് കുത്തനെ ഉയര്‍ത്തേണ്ടി വരും. വൈദ്യുതിബോര്‍ഡിന് പുറമേ ജീവനക്കാരുടെ വിവിധ സംഘടനകളും താരിഫ് നയത്തിലെ ആശങ്ക റഗുലേറ്ററി കമ്മിഷന്‍ സിറ്റിങ്ങില്‍ ഉന്നയിച്ചു. കേന്ദ്രം താരിഫ് നയം അംഗീകരിക്കുന്നതിന് മുമ്പാണ് അതിലെ പ്രധാന വ്യവസ്ഥകള്‍ ഉള്‍പ്പെടുത്തി സംസ്ഥാന റഗുലേറ്ററി കമ്മിഷന്‍ താരിഫ് നയം തയാറാക്കിയതെന്നാണ് പ്രധാന ആക്ഷേപം.