മോസ്‌കോ: റഷ്യയില്‍ പ്രിന്റിങ് കമ്പനിയിലുണ്ടായ തീപിടുത്തത്തില്‍ 16 ജീവനക്കാര്‍ കൊല്ലപ്പെട്ടു. മരിച്ചവരെല്ലാം കുടിയേറ്റക്കാരായ തൊഴിലാളികളാണെന്ന് റഷ്യന്‍ അധികൃതര്‍ പറഞ്ഞു. കെട്ടിടത്തിന്റെ മതില്‍ തകര്‍ത്താണ് അഗ്‌നിശമന സേനാംഗങ്ങള്‍ കമ്പനിയില്‍ പ്രവേശിച്ചത്. 16 പേരുടെ മൃതദേഹങ്ങള്‍ കണ്ടെടുത്തതായി റഷ്യന്‍ വാര്‍ത്താഏജന്‍സി ടാസ് അറിയിച്ചു. മോസ്‌കോയുടെ വടക്കന്‍ മേഖലയിലാണ് അപകടമുണ്ടായ കമ്പനി പ്രവര്‍ത്തിക്കുന്നത്. രണ്ടു മണിക്കൂര്‍ കൊണ്ട് തീ അണയ്ക്കാനായി. സംഭവത്തില്‍ അന്വേഷണം ആരംഭിച്ചതായും കുറ്റക്കാര്‍ക്കെതിരേ നടപടിയുണ്ടാകുമെന്നും റഷ്യന്‍ സര്‍ക്കാര്‍ അറിയിച്ചു.