'നവകേരള സദസ് അല്ല നാടുവാഴി സദസ്' ; യാത്ര കഴിഞ്ഞാല്‍ മ്യൂസിയത്തില്‍ കയറാന്‍ പോകുന്നത് കമ്മ്യൂണിസ്റ്റ് പാര്‍ട്ടി: വി മുരളീധരന്‍

തിരുവനന്തപുരം: നവകേരള സദസിനെ പരിഹസിച്ച് കേന്ദ്രമന്ത്രി വി.മുരളീധരന്‍. ഇതിന്റെ പേര് നവ കേരള സദസ് എന്നല്ല നാടുവാഴി സദസാണെന്നായിരുന്നു കേന്ദ്രമന്ത്രിയുടെ പരിഹാസം. ജനങ്ങളെ കാണാന്‍ പണ്ടുകാലത്ത് നാടുവാഴികള്‍ എഴുന്നള്ളുന്നത് പോലെയാണ് പിണറായിയുടെ നാടുവാഴി സദസെന്ന് വി മുരളീധരന്‍ പറഞ്ഞു.

യാത്ര കഴിഞ്ഞാല്‍ ബസല്ല, കമ്യൂണിസ്റ്റ് പാര്‍ട്ടി തന്നെയാകും മ്യൂസിയത്തിലേക്ക് കയറാന്‍ പോകുന്നതെന്നും കേന്ദ്രമന്ത്രി പറഞ്ഞു. തിരുവനന്തപുരത്ത് മാധ്യമങ്ങളോട് പ്രതികരിക്കുകയായിരുന്നു വി. മുരളീധരന്‍

ജനങ്ങളെ കാണിക്കാന്‍ പറ്റാത്ത അത്രയും ആഡംബരമാണ് ബസിനുള്ളില്‍ ഉള്ളത്. യാത്രയുടെ കാര്യം വരുമ്പോള്‍ സാമ്പത്തിക പ്രതിസന്ധിയില്ല. പെന്‍ഷനും കര്‍ഷകരുടെ കാര്യവും ചോദിക്കുമ്പോള്‍ പ്രതിസന്ധിയാണെന്നും സാമ്പത്തിക പ്രതിസന്ധി കാലത്ത് നടത്തേണ്ട യാത്രയാണോ ഇതെന്ന് ജനങ്ങള്‍ വിലയിരുത്തുമെന്നും മുരളീധരന്‍ പറഞ്ഞു.