മലപ്പുറം: ലോകകപ്പ് സ്വപ്‌നം പങ്കുവെച്ച പ്രധാനമന്ത്രി നരേന്ദ്രമോദിയെ ട്രോളി മുന്‍ മന്ത്രി പി.കെ അബ്ദുറബ്ബ്. വികസന മാമാങ്കങ്ങള്‍ മാത്രം നടന്ന് നടന്ന് ഇന്ത്യക്കാര്‍ക്ക് മടുത്തിട്ടുണ്ട് മോഡി ജീ.. അവരൊന്ന് റിലാക്‌സാവട്ടെ.. എന്ന് തുടങ്ങുന്ന ഫേസ്ബുക്ക് പോസ്റ്റിലാണ് അബ്ദുറബ്ബിന്റെ വിമര്‍ശനം.

ഖത്തറില്‍ നടക്കുന്നതുപോലെ ഒരു ഉത്സവം ഇന്ത്യയിലും നടക്കുമെന്നും രാജ്യത്തെ യുവാക്കളില്‍ തനിക്ക് പൂര്‍ണവിശ്വാസമുണ്ടെന്നും പ്രധാനമന്ത്രി പറഞ്ഞിഞ്ഞിരുന്നു. ത്രിവര്‍ണ പതാകയ്ക്കായി ഇന്ത്യന്‍ ജനത അന്ന് ആര്‍ത്തുവിളിക്കും.അങ്ങനെയൊരു ദിനം വിദൂരമല്ലെന്നും മോദി പറഞ്ഞിരുന്നു. അതിന് മറുപടിയെന്നോണമാണ് അബ്ദുറബ്ബിന്റെ ഫേസ്ബുക്ക് പോസ്റ്റ്.

ഫേസ്ബുക്ക് പോസ്റ്റിന്റെ പൂര്‍ണ രൂപം..

വികസന മാമാങ്കങ്ങള്‍ മാത്രം നടന്ന്
നടന്ന് ഇന്ത്യക്കാര്‍ക്ക് മടുത്തിട്ടുണ്ട്
മോഡി ജീ.. അവരൊന്ന് റിലാക്‌സാവട്ടെ.
ഖത്തറിലെപ്പോലെ ഇന്ത്യയിലും ഫുട്‌ബോള്‍ മാമാങ്കങ്ങള്‍ സംഘടിപ്പിക്കുമെന്ന അങ്ങയുടെ പ്രസ്താവന ഇന്ത്യന്‍
ജനതയെ തെല്ലൊന്നുമല്ല ആഹ്ലാദഭരിതരാക്കിയിട്ടുള്ളത്.
ഒരു ലിറ്റര്‍ പെട്രോളിന് നൂറ് രൂപക്ക്
മുകളില്‍ ചെലവാക്കാന്‍ മാത്രം
സമ്പന്നമായ രാജ്യമാണ് നമ്മുടേത്.
ഒരു അമേരിക്കന്‍ ഡോളര്‍ വാങ്ങാന്‍ 82.63
ഇന്ത്യന്‍ രൂപ ചെലവാക്കേണ്ടത്ര ഇന്ത്യന്‍
രൂപയും ഉയര്‍ന്നു നില്‍ക്കുന്നു.
ഇത്രമേല്‍ 'സമ്പന്നമായ' ഒരു രാജ്യത്ത് ഒരു ലോകകപ്പ് മാമാങ്കം എന്നത് ഇനിയും
വൈകിക്കൂടാ.
പന്തും, കപ്പും റെഡിയാണ്.
ബാക്കി കാര്യങ്ങള്‍ നടക്കട്ടെ.