മലപ്പുറം: 'ജിഹാദ്: വിമര്‍ശനവും യാഥാര്‍ഥ്യവും' എന്ന പ്രമേയത്തില്‍ ഒക്ടോബര്‍, നവംബര്‍, ഡിസംബര്‍ മാസങ്ങളില്‍ ബോധനയത്‌നം നടത്താന്‍ മലപ്പുറത്ത് ചേര്‍ന്ന സമസ്ത ഏകോപന സമിതി യോഗം തീരുമാനിച്ചു. ലൗ ജിഹാദ്, നാര്‍കോട്ടിക് ജിഹാദ് എന്നിങ്ങനെ സമൂഹത്തില്‍ നടന്നുകൊണ്ടിരിക്കുന്ന തെറ്റായ പ്രചാരണങ്ങളുടെ യാഥാര്‍ഥ്യങ്ങള്‍ ബോധ്യപ്പെടുത്തുക, സാമുദായിക സൗഹൃദം ഊട്ടിയുറപ്പിക്കുക, സമൂഹത്തില്‍ നടന്നുകൊണ്ടിരിക്കുന്ന അധാര്‍മികതയ്‌ക്കെതിരേ ബോധവല്‍ക്കരണം നടത്തുക എന്നിവയാണ് ബോധനയത്‌നം കൊണ്ട് ഉദ്ദേശിക്കുന്നത്. മഹല്ലുതല സ്‌ക്വാഡ് വര്‍ക്ക്, നേതാക്കളുടെ സന്ദേശം, ലഘുലേഖ വിതരണം, സൗഹൃദ കൂട്ടായ്മ തുടങ്ങിയ പരിപാടികളാണ് പ്രധാനമായും സംഘടിപ്പിക്കുക.
സംസ്ഥാനതല ഉദ്ഘാടനം ഒക്ടോബര്‍ ഒമ്പതിന് എറണാകുളത്ത് നടക്കും. സമസ്തയുടെ വിവിധ പോഷക സംഘടനകള്‍ ഈ കാലയളവില്‍ നടത്തേണ്ട പരിപാടികള്‍ യോഗത്തില്‍ നിര്‍ണയിച്ചു നല്‍കി.

സമസ്ത കേരള ജംഇയ്യത്തുല്‍ ഉലമ പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ അധ്യക്ഷനായി. ജന. സെക്രട്ടറി പ്രൊഫ. കെ. ആലിക്കുട്ടി മുസ്‌ലിയാര്‍ ഉദ്ഘാടനം ചെയ്തു. ഡോ. ബഹാഉദ്ദീന്‍ മുഹമ്മദ് നദ്‌വി കൂരിയാട്, എ.വി അബ്ദുറഹ്മാന്‍ മുസ്‌ലിയാര്‍ നന്തി, ആദൃശ്ശേരി ഹംസക്കുട്ടി മുസ്‌ലിയാര്‍, വാക്കോട് മൊയ്തീന്‍ കുട്ടി മുസ്‌ലിയാര്‍, ഡോ. എന്‍.എ.എം അബ്ദുല്‍ ഖാദിര്‍, അബ്ദുല്‍ ഹമീദ് ഫൈസി അമ്പലക്കടവ്, അബ്ദുസ്സമദ് പൂക്കോട്ടൂര്‍, യു. മുഹമ്മദ് ശാഫി ഹാജി, കെ.എം അബ്ദുല്ല മാസ്റ്റര്‍ കൊട്ടപ്പുറം, ഓണമ്പിള്ളി മുഹമ്മദ് ഫൈസി, സത്താര്‍ പന്തലൂര്‍, കെ.എച്ച് കോട്ടപ്പുഴ പ്രസംഗിച്ചു. സമസ്ത വിദ്യാഭ്യാസ ബോര്‍ഡ് മാനേജര്‍ കെ. മോയിന്‍കുട്ടി മാസ്റ്റര്‍ സ്വാഗതവും കണ്‍വീനര്‍ മുസ്തഫ മാസ്റ്റര്‍ മുണ്ടുപാറ നന്ദിയും പറഞ്ഞു.