മെര്‍ക്കേവ ടാങ്കുകള്‍ ഉള്‍പെടെ ഗസ്സയില്‍ 11 ഇസ്‌റാഈല്‍ സൈനിക വാഹനങ്ങള്‍ തകര്‍ത്ത് അല്‍ ഖുദ്‌സ് ബ്രിഗേഡ്

ഗസ്സ: ഗസ്സയില്‍ ഇസ്‌റാഈല്‍ സൈനിക വാഹനങ്ങള്‍ തകര്‍ത്ത് അല്‍ ഖുദ്‌സ് ബ്രിഗേഡ്സ്. അല്‍സൈത്തൂന്‍, തല്‍അല്‍ ഹവ, അല്‍ ശാത്തി, ശൈഖ് റദ്‌വാന്‍, ജുര്‍ അല്‍ദിക്ക് എന്നിവിടങ്ങളില്‍ കടന്നാക്രമണം നടത്തിയ വാഹനങ്ങളാണ് തകര്‍ത്തതെന്ന് സംഘം ടെലിഗ്രാം പേജില്‍ വ്യക്തമാക്കുന്നു. അല്‍ഖസ്സാം ബ്രിഗേഡിന്റെ സൈനിക വിഭാഗമാണ് അല്‍ ഖുദ്‌സ ബ്രിഗേഡ്സ്. മെര്‍ക്കേവ ടാങ്കുകള്‍ ഉള്‍പെടെയാണ് തകര്‍ത്തതെന്നും റിപ്പോര്‍ട്ടില്‍ പറയുന്നു.

47 ദിവസത്തെ തുടര്‍ച്ചയായ ആക്രമണങ്ങള്‍ക്ക് ശേഷം ബുധനാഴ്ച രാവിലെ തീരുമാനമായ നാല് ദിവസത്തെ വെടിനിര്‍ത്തല്‍ ഇതുവരെ നടപ്പിലായിട്ടില്ല. അതിനിടെ വെള്ളിയാഴ്ചക്കു മുമ്പ് ഫലസ്തീനി തടവുകാരെ വിട്ടയക്കില്ലെന്ന് ഇസ്‌റാഈല്‍ വ്യക്തമാക്കുകയും ചെയ്തിരുന്നു. ഇസ്‌റാഈല്‍ ദേശീയ സുരക്ഷാ ഉപദേഷ്ടാവ് ബുധനാഴ്ച രാത്രിയാണ് ഇക്കാര്യം വ്യക്തമാക്കിയത്. കഴിഞ്ഞ ദിവസവും ഗസ്സയില്‍ ഇസ്‌റാഈല്‍ അതിശക്തമായ ആക്രമണം അഴിച്ചു വിട്ടിരുന്നു.

അതേസമയം, വെടിനിര്‍ത്തല്‍ ഉടന്‍ നടപ്പില്‍ വരുമെന്ന് ഖത്തര്‍ അറിയിച്ചിട്ടുണ്ട്. ഖത്തറിന്റെ മധ്യതസ്ഥതയിലാണ് ഇസ്‌റാഈലും ഹമാസും വെടിനിര്‍ത്തല്‍ ധാരണയിലെത്തുന്നത്. ഹമാസ് ബന്ദികളാക്കിയവരില്‍ 50 പേരെ മോചിപ്പിക്കുന്നതിന് പകരമായി നാലുദിവസത്തേക്ക് താല്‍ക്കാലികമായി വെടിനിര്‍ത്തുകയും ഇസ്‌റാഈല്‍ പലപ്പോഴായി പിടികൂടിയ 150 ഫലസ്തീനി തടവുകാരെ മോചിപ്പിക്കുകയും ചെയ്യുകയാണ് ഹമാസും ഇസ്‌റാഈലും തമ്മിലെ ഉടമ്പടിയുടെ കാതല്‍. വെടിനിര്‍ത്തല്‍ കാലയളവില്‍ യാതൊരു സൈനികനീക്കമോ ആക്രമണമോ പാടില്ലെന്നും ഈ സമയത്ത് സഞ്ചാര സ്വാതന്ത്ര്യവും മാനുഷികസഹായം എത്താനുള്ള സംവിധാനം ഉറപ്പാക്കണമെന്നും വ്യവസ്ഥയുണ്ട്.