കണ്ണൂര്‍: ഡിജിറ്റല്‍ യുഗത്തില്‍ 14 മാസംകൊണ്ട് ഖുര്‍ആന്‍ കൈയെഴുത്ത് പ്രതി പൂര്‍ത്തിയാക്കി വിസ്മയമായി വിദ്യാര്‍ഥിനി. കണ്ണൂര്‍സിറ്റി സ്വദേശി കൊടപ്പറമ്പ് അല്‍ഹംദിലെ ഫാത്തിമ ഷഹബയാണ് ഖുര്‍ആന്‍ പൂര്‍ണമായും എഴുതി പൂര്‍ത്തിയാക്കിയത്. കണ്ണൂര്‍ അല്‍സലാമ കോളജിലെ രണ്ടാംവര്‍ഷ ബി.എസ്.സി ഇന്റീരിയര്‍ ഡിസൈനിങ് വിദ്യാര്‍ഥിനിയാണ് ഷഹബ.
ഖുര്‍ആന്‍ ഉള്‍പ്പടെ ആദ്യകാലങ്ങളില്‍ കൈയെഴുത്ത് പ്രതികളിലായാണ് പ്രചരിപ്പിക്കപ്പെട്ടത്. അച്ചുകൂടങ്ങളും ആധുനിക പ്രിന്റിങും വ്യാപകമാവുന്നതിന് മുമ്പ് കാതിബുമാര്‍ എന്ന വിഭാഗം ഇത്തരത്തില്‍ എഴുതാനുണ്ടായിരുന്നു. വലിയ ഗ്രന്ഥങ്ങള്‍ ഒന്നിലധികം കാതിബുകള്‍ ചേര്‍ന്നാണ് പൂര്‍ത്തിയാക്കിയിരുന്നത്. ഷഹബ ഒരു വര്‍ഷവും രണ്ടുമാസവുമെടുത്താണ് ഖുര്‍ആന്‍ മുഴുവനും എഴുതി പൂര്‍ത്തിയാക്കിയത്. സാധാരണ പെന്‍സിലും ഗ്ലിറ്റര്‍ പെന്‍സിലും ഉപയോഗിച്ച് സ്‌കെച്ച് പേപ്പറിലാണ് ഖുര്‍ആനിന്റെ കൈയെഴുത്ത് പ്രതി ഒരുക്കിയത്.

ഖുര്‍ആനില്‍ നിന്നുള്ള ഭാഗങ്ങള്‍ കാലിഗ്രഫി രീതിയില്‍ എഴുതുന്നത് ലോക്ക്ഡൗണ്‍ കാലത്ത് വ്യാപകമായിരുന്നെങ്കിലും വിശുദ്ധ ഗ്രന്ഥം മുഴുവനായി കൈകൊണ്ട് എഴുതി പൂര്‍ത്തിയാക്കുന്നത് അപൂര്‍വമാണ്. ഒമാനില്‍ നിന്ന് പത്താംതരം പൂര്‍ത്തിയാക്കിയ ഷഹബ കണ്ണൂര്‍സിറ്റി ദീനുല്‍ ഇസ്‌ലാംസഭ ഗേള്‍സ് സ്‌കൂളിലാണ് ഹയര്‍സെക്കന്‍ഡറി പഠനം പൂര്‍ത്തിയാക്കിയത്. ഒമാന്‍ കാബൂറയിലെ പ്രവാസിയായ അബ്ദുല്‍റഊഫിന്റെയും നാദിയ റഊഫിന്റെയും മകളാണ് ഷഹബ.