വടകര: യൂത്ത്‌ലീഗ് പ്രവര്‍ത്തകന്‍ അസ്‌ലമിനെ കൊലപ്പെടുത്തിയ കേസിലെ പ്രതികളെ അറസ്റ്റ് ചെയ്യാത്ത പൊലിസ് നടപടിക്കെതിരേ നാദാപുരം മണ്ഡലം ലീഗ് കമ്മിറ്റിയുടെ നേതൃത്വത്തില്‍ എസ്.പി ഓഫിസ് മാര്‍ച്ച് നടത്തി. പാലോളിപ്പാലത്ത് നിന്ന് ആരംഭിച്ച മാര്‍ച്ച് എസ്.പി ഓഫിസ് പരിസരത്ത് പൊലിസ് തടഞ്ഞു.
സംഭവത്തില്‍ പൊലിസിന്റെ ഭാഗത്തു നിന്നു ഗുരുതര വീഴ്ചയാണ് ഉണ്ടായിട്ടുള്ളതെന്നും മനുഷ്യത്വരഹിതമായ സമീപനത്തില്‍ നിന്ന് സി.പി.എം പാഠംപഠിച്ചില്ലെന്നും മാര്‍ച്ച് ഉദ്ഘാടനം ചെയ്ത് മുസ്‌ലിം ലീഗ് നേതാവ് ഡോ. എം.കെ മുനീര്‍ എം.എല്‍.എ പറഞ്ഞു. ഈ സര്‍ക്കാരില്‍ നിന്നു നീതി പ്രതീക്ഷിക്കുന്നില്ല. കേസില്‍ പ്രതിയായ സി.പി.എം ബ്രാഞ്ച് സെക്രട്ടറിക്കു ജാമ്യം ലഭിച്ചത് പൊലിസിന്റെ വീഴ്ചയാണെന്നും അദ്ദേഹം കൂട്ടിച്ചേര്‍ത്തു.
മുസ്‌ലിം ലീഗ് ജില്ലാ പ്രസിഡന്റ് ഉമ്മര്‍ പാണ്ടികശാല, പാറക്കല്‍ അബ്ദുല്ല എം.എല്‍.എ, ജില്ലാ സെക്രട്ടറി എം.സി മായിന്‍ഹാജി, എന്‍.സി അബൂബക്കര്‍ സംസാരിച്ചു.