ന്യൂഡല്‍ഹി: മോഡലിന്റെ മുടി വെട്ടി 'കുളമാക്കി'യതിന് സലൂണ്‍ രണ്ട് കോടി രൂപ നഷ്ടപരിഹാരം നല്‍കണമെന്ന് ഉത്തരവ്. ഡല്‍ഹിയിലെ ഐ.ടി.സി മൗര്യ ഹോട്ടല്‍ വനിതാ മോഡലിന് നഷ്ടപരിഹാരം നല്‍കണമെന്നാണ് ദേശീയ ഉപഭോക്തൃ തര്‍ക്ക പരിഹാര കമ്മിഷന്‍ വിധിച്ചത്. മോഡല്‍ ആഷ്‌ന റോയ് ആണ് പരാതിക്കാരി. മുടി വെട്ടി നശിപ്പിച്ചതിനാല്‍ സിനിമയില്‍ ഉള്‍പ്പെടെ അവസരങ്ങള്‍ നഷ്ടമായെന്ന് പരാതിക്കാരി പറഞ്ഞു.

2018 ലാണ് കേസിനാസ്പദമായ സംഭവം. ഇപ്പോഴാണ് വിധി വരുന്നത്. മുടിവെട്ടാന്‍ പോയ തനിക്ക് കുറ്റിമുടിയുമായാണ് തിരിച്ചിറങ്ങേണ്ടിവന്നത് എന്ന് ഹരജിക്കാരി പറഞ്ഞു. ഇതുമായി ബന്ധപ്പെട്ട് മാനസിക സമ്മര്‍ദ്ദവും അനുഭവിച്ചു. ജസ്റ്റിസ് ആര്‍.കെ അഗര്‍വാള്‍ ആണ് ഉത്തരവ് പുറപ്പെടുവിച്ചത്. പരാതിക്കാരിക്ക് തന്റെ മുടിയുമായി വൈകാരിക ബന്ധമുണ്ടായിരുന്നുവെന്നും അവരുടെ ജീവിതത്തെ വരെ ഈ സംഭവം പ്രതികൂലമായി ബാധിച്ചുവെന്നും കോടതി ചൂണ്ടിക്കാട്ടി.