കോഴിക്കോട്: സന്തോഷ് ട്രോഫിയിൽ നിലവിലെ ചാംപ്യൻമാരായ കേരളം ഇന്ന് ആദ്യ മത്സരത്തിനിറങ്ങും. പ്രാഥമിക റൗണ്ടിലെ മത്സരത്തിൽ രാജസ്ഥാനാണ് എതിരാളികൾ. വൈകിട്ട് മൂന്നരക്ക് കോഴിക്കോട് ഇ.എം.എസ് സ്റ്റേഡിയത്തിലാണ് കളി.

ഗ്രൂപ്പ് രണ്ടിലെ പ്രാഥമിക റൗണ്ടാണ് കോഴിക്കോട് നടക്കുന്നത്. രാജസ്ഥാൻ, ജമ്മു കശ്മീർ, മിസോറം, ആന്ധ്രാ പ്രദേശ്, ബീഹാർ എന്നിവരാണ് കേരളമടങ്ങുന്ന ഗ്രൂപ്പ് രണ്ടിലെ മറ്റു ടീമുകൾ. മികച്ച രണ്ട് ടീമുകൾക്കാണ് ഫൈനൽ റൗണ്ട് യോഗ്യത. ഗ്രൂപ്പിൽ മിസോറാമാണ് കേരളത്തിന്റെ പ്രധാന എതിരാളികൾ.

കഴിഞ്ഞതവണ ബംഗാളിനെ ഷൂട്ടൗട്ടിൽ തോൽപ്പിച്ചാണ് കേരളം കിരീടം നേടിയത്. ഇത്തവണയും കേരളം ഫൈനൽ റൗണ്ടിന് വേദിയാവാൻ സാധ്യതയുണ്ട്. സെമി ഫൈനൽ, ഫൈനൽ മത്സരങ്ങൾ സൗദി അറേബ്യയിൽ നടത്താനുള്ള ആലോചനയിലുമാണ് ആൾ ഇന്ത്യ ഫുട്‌ബോൾ ഫെഡറേഷൻ.

ഗോൾ കീപ്പറായ മിഥുന്റെ കീഴിൽ ആണ് 22 അംഗ കേരള ടീമിനെയാണ് പ്രഖ്യാപിച്ചത്. 2017-2018, 2021-22 സീസണുകളിൽ കേരളം കിരീടം നേടിയപ്പോൾ ഗോൾവല കാത്തതും മിഥുനായിരുന്നു.

ഗോൾ കീപ്പർമാർ: വി. മിഥുൻ (കണ്ണൂർ), പി.എ. അജ്മൽ (മലപ്പുറം), ടി.വി. അൽക്കേഷ് രാജ് (തൃശൂർ).

പ്രതിരോധം: എം. മനോജ്, ആർ. ഷിനു, ബെഞ്ചമിൻ ബോൾസ്റ്റർ, ജെ. ജെറിറ്റൊ (തിരുവനന്തപുരം), കെ. അമീൻ, യു. മുഹമ്മദ് സലിം (മലപ്പുറം), സച്ചു സിബി (ഇടുക്കി), അഖിൽ ജെ. ചന്ദ്രൻ (എറണാകുളം).

മധ്യനിര: ഋഷിദത്ത് (തൃശൂർ), എം. റാഷിദ്, റിസ്വാൻ അലി (കാസർകോട്), ഗിഫ്റ്റി സി. ഗ്രേഷ്യസ് (വയനാട്), നിജോ ഗിൽബർട്, പി. അജീഷ് (തിരുവനന്തപുരം), വിശാഖ് മോഹൻ (എറണാകുളം), കെ.കെ. അബ്ദു റഹീം (മലപ്പുറം).

മുന്നേറ്റനിര: എം. വിനീഷ്, ബി. നരേഷ്, ജോൺപോൾ.