നെടുമ്പാശ്ശേരി: സംസ്ഥാന കോണ്‍ഗ്രസിലെ പ്രശ്‌നങ്ങള്‍ നേതാക്കളുമായി ചര്‍ച്ച ചെയ്ത് പരിഹരിക്കുമെന്ന് എ.ഐ.സി.സി ജനറല്‍ സെക്രട്ടറി താരിഖ് അന്‍വര്‍ പറഞ്ഞു. രണ്ടു ദിവസത്തെ കേരള സന്ദര്‍ശനത്തിനെത്തിയ അദ്ദേഹം നെടുമ്പാശ്ശേരി വിമാനത്താവളത്തില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു. 

കെ.പി.സി.സി രാഷ്ട്രീയകാര്യ സമിതിയില്‍ നിന്നും വി.എം സുധീരന്‍ രാജിവയ്ക്കാനുണ്ടായ സാഹചര്യം പരിശോധിക്കും. രാജി സംബന്ധിച്ച് കെ.പി.സി.സി പ്രസിഡന്റുമായും സുധീരനുമായും ചര്‍ച്ച ചെയ്യും. ആരോഗ്യപരമായ കാരണങ്ങളാണ് ചുമതലയില്‍ നിന്നും ഒഴിവാകാന്‍ കാരണമെന്നാണ് താന്‍ മനസിലാക്കുന്നതെന്നും താരിഖ് അന്‍വര്‍ പറഞ്ഞു. കനയ്യ കുമാറിനേയും ജിഗ്നേഷ് മേവാനിയേയും കോണ്‍ഗ്രസിലേക്ക് സ്വാഗതം ചെയ്യുകയാണ്. ഇവരുടെ വരവ് കോണ്‍ഗ്രസിന് ഏറെ ഗുണം ചെയ്യും. ചില നേതാക്കള്‍ കോണ്‍ഗ്രസ് വിട്ടത് കാര്യമാക്കുന്നില്ല. എല്ലാ മുതിര്‍ന്ന നേതാക്കളെയും സഹകരിപ്പിച്ചായിരിക്കും സംസ്ഥാന കോണ്‍ഗ്രസ് മുന്നോട്ട് നീങ്ങുക. അധികാരമുള്ള പാര്‍ട്ടിയിലേക്ക് ചിലര്‍ കൂറുമാറുകയെന്നത് പലയിടത്തുമുണ്ട്. 

ലക്ഷദ്വീപിലെ പ്രശ്‌നങ്ങള്‍ വിലയിരുത്തുന്നതിനായി ലക്ഷദ്വീപ് നേതാക്കളുമായി കൊച്ചിയില്‍ കൂടിക്കാഴ്ച നടത്തുമെന്നും അദ്ദേഹം പറഞ്ഞു. എ.ഐ.സി.സി സെക്രട്ടറി വിശ്വനാഥന്‍, കെ.പി.സി.സി വര്‍ക്കിങ് പ്രസിഡന്റ് പി.ടി തോമസ് എം.എല്‍.എ, എം.എല്‍.എമാരായ അന്‍വര്‍ സാദത്ത്, റോജി എം. ജോണ്‍, കെ.പി.സി.സി ജനറല്‍ സെക്രട്ടറി ബി.എ അബ്ദുള്‍ മുത്തലിബ്, ഡി.സി.സി പ്രസിഡന്റ് മുഹമ്മദ് ഷിയാസ്, കെ.പി.സി.സി സെക്രട്ടറി എം.ആര്‍ അഭിലാഷ്, ഡി.സി.സി ജനറല്‍ സെക്രട്ടറി ജോസഫ് ആന്റണി തുടങ്ങിയവര്‍ ചേര്‍ന്ന് വിമാനത്താവളത്തില്‍ താരിഖ് അന്‍വറിനെ സ്വീകരിച്ചു.