വാഷിങ്ടണ്‍: ജനാധിപത്യ മൂല്യങ്ങള്‍ മുറുകെ പിടിക്കണമെന്നും ഇന്ത്യയുടെ വൈവിധ്യം കാത്തുസൂക്ഷിക്കണമെന്നും പ്രധാനമന്ത്രി നരേന്ദ്രമോദിയോട് അമേരിക്കന്‍ പ്രസിഡന്റ് ജോ ബൈഡന്‍. മോദിയുടെ അമേരിക്കന്‍ സന്ദര്‍ശനത്തിന്റെ ഭാഗമായി നടന്ന കൂടിക്കാഴ്ചയിലായിരുന്നു ബൈഡന്റെ പരാമര്‍ശം.

വരുന്ന ഗാന്ധിജയന്തി ദിനത്തെ പരാമര്‍ശിച്ച്, അഹിംസ, സഹിഷ്ണുത, സഹനം എന്നിവയെല്ലാമാണ് എപ്പോഴും മുന്നിട്ട് നില്‍ക്കേണ്ടതെന്നും ബൈഡന്‍ പറഞ്ഞു. അസമില്‍ ബി.ജെ.പി സര്‍ക്കാര്‍ നടത്തുന്ന കുടിയൊഴിപ്പിക്കല്‍ പ്രവൃത്തികളും പൊലിസ് വെടിവയ്പും രാജ്യാന്തര ശ്രദ്ധ നേടുന്നതിനിടെയാണ് ബൈഡന്റെ പരാമര്‍ശം. യു.എസിനെ ശക്തിപ്പെടുത്തുന്നതില്‍ രാജ്യത്തെ 40 ലക്ഷം ഇന്ത്യന്‍ വംശജരുടെ പങ്ക് വലുതാണെന്നും ബൈഡന്‍ പറഞ്ഞു.

 

വിര്‍ച്വല്‍ ഉച്ചകോടികളിലും ടെലിഫോണിലൂടെയും ഇരുവരും മൂന്നുതവണ സംസാരിച്ചിട്ടുണ്ടെങ്കിലും ജനുവരിയില്‍ ജോ ബൈഡന്‍ അധികാരമേറ്റ ശേഷം ആദ്യമായാണ് മോദിയുമായി കൂടിക്കാഴ്ച നടത്തുന്നത്.

കൊവിഡ് മഹാമാരി, കാലാവസ്ഥാ വ്യതിയാനം തുടങ്ങിയ വെല്ലുവിളികളെ യോജിച്ച് നേരിടേണ്ടതും ഉഭയകക്ഷിബന്ധം ശക്തിപ്പെടുത്തേണ്ടതും ചര്‍ച്ചയായെന്ന് മോദി പിന്നീട് ട്വീറ്റ് ചെയ്തു.