ന്യൂഡല്‍ഹി: കാറപകടത്തില്‍ പരുക്കേറ്റ ഇന്ത്യന്‍ വിക്കറ്റ് കീപ്പര്‍ ബാറ്റ്‌സ്മാന്‍ ഋഷഭ് പന്തിനെ തനിക്ക് തിരിച്ചറിയാന്‍ സാധിച്ചിരുന്നില്ലെന്നും ക്രിക്കറ്റ് കളി കാണാറില്ലെന്നും രക്ഷാപ്രവര്‍ത്തനത്തിന് നേതൃത്വം നല്‍കിയ ഡ്രൈവര്‍. ഡിവൈഡറില്‍ ഇടിച്ച ശേഷം തീപിടിച്ച മെഴ്‌സിഡസ് കാറില്‍ നിന്ന് ഋഷഭ് പന്തിനെ പുറത്തെടുക്കാനും ആംബുലന്‍സ് ഏര്‍പ്പാടാക്കാനും വേഗത്തില്‍ പ്രവര്‍ത്തിച്ചത് ഹരിയാന റോഡ്‌വേയ്‌സ് ബസ് ഡ്രൈവര്‍ സുശീല്‍ മാന്‍ ആയിരുന്നു.

എതിര്‍ദിശയില്‍ നിന്ന് അതിവേഗത്തില്‍ വന്ന കാര്‍ ഡിവൈഡറില്‍ ഇടിക്കുകയായിരുന്നുവെന്ന് സുശീല്‍ മാന്‍ പറഞ്ഞു. നിയന്ത്രണം നഷ്ടമായി തിരിഞ്ഞും മറിഞ്ഞും പോകുന്നതിനാല്‍ കാര്‍ ബസിനടിയിലേക്ക് മറിയുമെന്ന് ഞാന്‍ കരുതി. ഞാന്‍ എന്റെ ബസ് സൈഡില്‍ നിര്‍ത്തി പെട്ടെന്ന് ഡിവൈഡറിലേക്ക് ഓടി. ഡ്രൈവര്‍ (ഋഷഭ് പന്ത്) ജനലിലൂടെ പകുതി പുറത്തായിരുന്നു. താന്‍ ഒരു ക്രിക്കറ്റ് കളിക്കാരനാണെന്ന് അദ്ദേഹം എന്നോട് പറഞ്ഞു. അദ്ദേഹം അമ്മയെ വിളിക്കാന്‍ ആവശ്യപ്പെട്ടു. എന്നാല്‍ അദ്ദേഹത്തിന്റെ ഫോണ്‍ സ്വിച്ച് ഓഫ് ആയിരുന്നു. ഞാന്‍ ക്രിക്കറ്റ് കാണാറില്ല, പരുക്കേറ്റത് ഋഷഭ് പന്തിനാണെന്ന് എനിക്കറിയില്ലായിരുന്നു. എന്നാല്‍ എന്റെ ബസിലെ മറ്റുള്ളവര്‍ അവനെ തിരിച്ചറിഞ്ഞു-സുശീല്‍ മാന്‍ പറഞ്ഞു.

ഋഷഭിനെ രക്ഷപ്പെടുത്തിയ ശേഷം, മറ്റാരെങ്കിലും കാറിലുണ്ടോയെന്ന് പരിശോധിക്കാന്‍ ഞാന്‍ വേഗം കാറില്‍ തിരഞ്ഞു. അദ്ദേഹത്തിന്റെ നീല ബാഗും കാറില്‍ നിന്ന് ലഭിച്ച 7,000-8,000 രൂപയും ആംബുലന്‍സില്‍ കൊടുത്തുവെന്നും സുശീല്‍ മാന്‍ പറഞ്ഞു.

ഹരിയാന റോഡ്‌വേയ്‌സ് അഭിനന്ദന കത്തും ഒരു ഷീല്‍ഡും നല്‍കി സുശീലിനെയും പരംജീതിനെയും ആദരിച്ചതായി വാര്‍ത്താ ഏജന്‍സിയായ പി.ടി.ഐ റിപ്പോര്‍ട്ട് ചെയ്തു.