വണ്ടൂര്‍: ചെറുകോട് കെ.എം.എം.എ.യു.പി സ്‌കൂളിലെ പോളിഹൗസ് കത്തിച്ചതിനു പിന്നില്‍ വിദ്യാര്‍ഥികളെന്നു പൊലിസ്. കഴിഞ്ഞ 24നായിരുന്നു സ്‌കൂളിലെ ഉച്ചഭക്ഷണത്തിനടക്കം പച്ചക്കറി ഉണ്ടാക്കിയിരുന്ന പോളിഹൗസ് കത്തിയ നിലയില്‍ കണ്ടെത്തിയത്. തുടര്‍ന്നു സ്‌കൂള്‍ അധികൃതര്‍ നല്‍കിയ പരാതില്‍ പൊലിസ് നടത്തിയ അന്വേഷണത്തിലാണു കുട്ടികള്‍ തന്നെയാണു തീപിടുത്തത്തിനു പിന്നില്‍ എന്നു കണ്ടെത്തിയത്. സംഭവ ദിവസം സ്‌കൂളിന്റെ സമീപത്തെ മൈതാനത്ത് ഫുട്‌ബോള്‍ മത്സരം നടന്നിരുന്നു. ഇതിനിടെ ചില വിദ്യാര്‍ഥികള്‍ സ്‌കൂളില്‍ കയറി പുകവലിക്കുന്നതിനിടെയാണു പോളി ഹൗസിനു തീപിടിച്ചതെന്നും പൊലിസ് പറഞ്ഞു.സംഭവത്തെത്തുടര്‍ന്ന് സ്‌കൂള്‍ പരിസരത്തെ കടകളില്‍ നടത്തിയ പരിശോധനയില്‍ പതിനായിരം രൂപയുടെ പുകയില ഉല്‍പന്നങ്ങള്‍ പിടികൂടി.