അരീക്കോട്: വിദ്യാര്‍ഥികള്‍ക്കു കഞ്ചാവു വില്‍പന നടത്തുന്നയാളെ പൊലിസ് പിടികൂടി. വാക്കാലൂര്‍ പുറക്കാടന്‍ വീട്ടില്‍ അസീസി(35)നെയാണു അരീക്കോട് എസ്‌ഐ കെ. സിനോദിന്റെ നേതൃത്വത്തിലുള്ള സംഘമാണു പിടികൂടിയത്. അരീക്കോട് പെരുമ്പറമ്പില്‍ കഞ്ചാവു വില്‍പനക്കെത്തിയതായിരുന്നു പ്രതി.
പൊലിസിനു ലഭിച്ച രഹസ്യ വിവരത്തിന്റെ അടിസ്ഥാനത്തില്‍ നടത്തിയ മിന്നല്‍ പരിശോധനയിലാണു പ്രതിയെ പിടികൂടിയത്. ഇയാളെ ഇതിനു മുമ്പു രണ്ടു തവണ എക്‌സൈസ് വകുപ്പ് അറസ്റ്റ് ചെയ്തിട്ടുണ്ട്. അരീക്കോട് സ്റ്റേഷനില്‍ ഇയാളുടെ പേരില്‍ കൊലക്കുറ്റത്തിനും കേസുണ്ട്. പ്രതിയില്‍ നിന്ന് 25 പായ്ക്കറ്റ് ലഹരി വസ്തുക്കളും പിടിച്ചെടുത്തിട്ടുണ്ട്.