സഊദിയിൽ സ്‌കൂൾ ബസും കാറും കൂട്ടിയിടിച്ച് നാല് വിദ്യാർഥിനികൾക്ക് ദാരുണാന്ത്യം; രണ്ട് പേർക്ക് പരിക്ക്

ദമാം: സ്‌കൂൾ ബസ് അപകടത്തിൽപ്പെട്ട് സഊദിയിൽ നാല് വിദ്യാർഥിനികൾ മരിച്ചു. അപകടത്തിൽ രണ്ടു പേർക്ക് പരുക്കേറ്റു. ജുബൈൽ ഇൻഡസ്ട്രിയൽ സിറ്റിയിലെ അൽമത്‌റഫിയ ഡിസ്ട്രിക്ടിൽ സ്‌കൂൾ ബസും കാറുമാണ് കൂട്ടിയിടിച്ചത്. മരിച്ചവരുടെയും പരിക്കേറ്റവരുടെയും വിശദാംശങ്ങൾ അധികൃതർ പുറത്തുവിട്ടിട്ടില്ല.

സഹോദരനൊപ്പം കാറിൽ സഞ്ചരിച്ച വിദ്യാർഥിനികളാണ് മരിച്ചത്. കാർ ഡ്രൈവർ ഗുരുതര പരിക്കേറ്റ്​ ജുബൈൽ അൽ-മന ആശുപത്രി തീവ്രപരിചരണ വിഭാഗത്തിലാണ്. പരിക്കേറ്റ ബസ് ഡ്രൈവറെ റോയൽ കമീഷൻ ആശുപത്രിയിൽ പ്രവേശിപ്പിച്ചു.

വിദ്യാർഥിനികൾ സഞ്ചരിച്ചിരുന്ന കാറും റോയൽ കമീഷൻ സ്കൂൾ ട്രാൻസ്പോർട്ട് ബസും കൂട്ടിയിടിച്ചാണ് അപകടമുണ്ടായത്. ഇടിയുടെ ആഘാതത്തിൽ കാർ നിശ്ശേഷം തകർന്നു. സിവിൽ ഡിഫൻസ്, ട്രാഫിക്, ഇൻഡസ്ട്രിയൽ സെക്യൂരിറ്റി, റെഡ് ക്രസന്റ്​ എന്നിവിടങ്ങളിൽ നിന്നുള്ള സംഘങ്ങൾ ഉടൻ സ്ഥലത്തെത്തി.