ടുറിന്‍: ചാംപ്യന്‍സ് ലീഗില്‍ ഇന്ന് കിടിലം പോരാട്ടം. ഗ്രൂപ്പ് എച്ചിലെ കരുത്തരായ ചെല്‍സിയും യുവന്റസും നേര്‍ക്കുനേര്‍. യുവന്റസിന്റെ ഹോം മൈതാനമായ ടുറിനിലാണ് മത്സരം. റൊണാള്‍ഡോ മാഞ്ചസ്റ്റര്‍ യുനൈറ്റഡിലേക്ക് പോയ ശേഷമുള്ള യുവന്റസിന്റെ രണ്ടാം ചാംപ്യന്‍സ് ലീഗ് മത്സരമാണിത്. കരുത്തരായ മാഞ്ചസ്റ്റര്‍ യുനൈറ്റഡും ബാഴ്‌സലോണയും ഇന്ന് കളത്തിലിറങ്ങുന്നുണ്ട്.

ഗ്രൂപ്പ് എച്ചില്‍ നിന്ന് പ്ലേ ഓഫ് സാധ്യത കല്‍പ്പിക്കപ്പെടുന്ന രണ്ട് ടീമുകളാണ് യുവന്റസും ചെല്‍സിയും. ആദ്യ മത്സരം ജയിച്ച ശേഷമാണ് ഇവര്‍ മുഖാമുഖമെത്തുന്നത്. യുവന്റസ് മാല്‍മോയെ എതിരില്ലാത്ത മൂന്ന് ഗോളുകള്‍ക്ക് പരാജയപ്പെടുത്തിയപ്പോള്‍ ചെല്‍സി ഒരു ഗോളിന് സെനിത്തിനെയും കീഴ്‌പ്പെടുത്തി. ഗ്രൂപ്പില്‍ ഇരുടീമിനും മൂന്ന് വീതം പോയിന്റുണ്ടെങ്കിലും ഗോള്‍ ശരാശരിയുടെ അടിസ്ഥാനത്തില്‍ യുവന്റസാണ് ഒന്നാമത്.

ക്രിസ്റ്റ്യാനോയുടെ അഭാവത്തില്‍ സീരി എയില്‍ മോശം ഫോമോടെയാണ് യുവന്റസ് തുടങ്ങിയതെങ്കിലും അവസാന രണ്ട് മത്സരങ്ങളില്‍ ജയം നേടിയത് ടീമിന് ആശ്വാസം പകരുന്നു. സീരി എയിലെ സാംപ്‌ഡോറിയക്കെതിരായ മത്സരത്തില്‍ പരുക്കേറ്റ് പുറത്തുപോയ ഡിബാല ഇന്നിറങ്ങില്ലയെന്നത് ടീമിന് ക്ഷീണം നല്‍കും. പരുക്കേറ്റ അല്‍വാരോ മൊറാട്ട, ആന്ദ്രേ റാബിയറ്റ് എന്നിവര്‍ ഇറങ്ങുന്ന കാര്യവും സംശയമാണ്. പ്രീമിയല്‍ ലീഗില്‍ മികച്ച കളി പുറത്തെടുക്കുന്ന ചെല്‍സിയെ പൂട്ടാന്‍ നിലവിലെ ഫോമില്‍ യുവന്റസ് പാടുപെടും.

ബെന്‍ഫിക്കയാണ് ഇന്ന് ബാഴ്‌സയുടെ എതിരാളികള്‍. ആദ്യ മത്സരത്തില്‍ ബയേണിനോട് ഗോളൊന്നും നേടാനാവാതെ മൂന്ന് ഗോളിന്റെ പരാജയം ഏറ്റുവാങ്ങിയ ബാഴ്‌സയ്ക്ക് ജയം അനിവാര്യമാണ്.