തിരൂര്‍: പ്രതികളെ പിടികൂടാനും ആയുധങ്ങള്‍ കണ്ടെത്താനും ലക്ഷ്യമിട്ട് ഉണ്യാലില്‍ പൊലിസ് റെയ്ഡ്. റെയ്ഡില്‍ ഇരുമ്പ് പൈപ്പ്, കൊടുവാള്‍, നെഞ്ചാക്ക് തുടങ്ങിയ ആയുധങ്ങള്‍ പൊലിസ് കണ്ടെടുത്തു. 15 ഇരുമ്പ് പൈപ്പുകള്‍, കൊടുവാള്‍, നെഞ്ചാക്ക് തുടങ്ങിയവയാണ് പിടിച്ചെടുത്തത്.
ഡിവൈ.എസ്.പി പി.ടി ബാലന്‍, തിരൂര്‍ സി.ഐ ഷാജി, താനൂര്‍ സി.ഐ അലവി തുടങ്ങിയവരുടെ നേതൃത്വത്തില്‍ നൂറോളം പൊലിസുകാരാണ് ഇന്നലെ റെയ്ഡ് നടത്തിയത്. സംഭവത്തില്‍ ഉള്‍പ്പെട്ട അറുപതോളം പ്രതികളുടെ വീടുകളിലും മറ്റുമാണ് പൊലിസ് പരിശോധന നടത്തിയത്.
ഇന്നലെ രാവിലെ ഒന്‍പതിനു പറവണ്ണ കടപ്പുറത്തുനിന്ന് ആരംഭിച്ച പരിശോധന ഉണ്യാല്‍ കടപ്പുറംവരെ നീണ്ടു.
മൂന്നു മണിക്കൂറോളമായിരുന്നു റെയ്ഡ്. ബോംബ് സ്‌ക്വാഡ്, ഡോഗ് സ്‌ക്വാഡ് തുടങ്ങിയവരും റെയ്ഡില്‍ പങ്കെടുത്തു. എന്നാല്‍, വീടുകളില്‍ പൊലിസ് റെയ്ഡ് നടത്തിയെങ്കിലും പ്രതികളെ പിടികൂടാന്‍ കഴിഞ്ഞില്ല. പ്രതികളെ പിടികൂടുന്നതുവരെ റെയ്ഡ് തുടരുമെന്നും വീടുകള്‍ പരിശോധിക്കുമെന്നും ഡിവൈ.എസ്.പി പറഞ്ഞു.
പ്രദേശത്തു സമാധാനാന്തരീക്ഷം പുനഃസ്ഥാപിക്കുന്നതുവരെ പൊലിസ് സാന്നിധ്യം ഉണ്യാല്‍ തീരദേശത്തുണ്ടാകുമെന്നും അദ്ദേഹം വ്യക്തമാക്കി.