നിയമം നടപ്പാക്കേണ്ടത് സര്‍ക്കാരിന്റെ ചുമതലയെന്നും കോടതി

 

ന്യൂഡല്‍ഹി: കര്‍ഷക സമരത്തിന്റെ പേരില്‍ ദേശീയപാതകള്‍ അനിശ്ചിതമായി എങ്ങനെ അടച്ചിടുമെന്ന് സുപ്രിംകോടതി. കര്‍ഷക സമരത്തെ തുടര്‍ന്ന് റോഡ് ഉപരോധിക്കുന്നതിനെതിരേ നോയിഡ സ്വദേശി മോണിക്ക അഗര്‍വാള്‍ സമര്‍പ്പിച്ച ഹരജി പരിഗണിക്കവെയാണ് റോഡ് തടസപ്പെടുത്തിയുള്ള സമരം അംഗീകരിക്കാനാവില്ലെന്ന് കോടതി നിരീക്ഷിച്ചത്. 

ജസ്റ്റിസ് സഞ്ജയ് കിഷാന്‍ കൗള്‍, എം.എം സുന്ദരേശ് എന്നിവരടങ്ങുന്ന ബെഞ്ചിന്റേതാണ് നിരീക്ഷണം. ഡല്‍ഹി - ഉത്തര്‍പ്രദേശ് അതിര്‍ത്തിയിലെ റോഡ് തുറക്കാനാവശ്യമായ നടപടികള്‍ അടിയന്തരമായി സ്വീകരിക്കണമെന്നും കര്‍ഷകരുമായി ചര്‍ച്ച ചെയ്ത് പരിഹാരമുണ്ടാക്കണമെന്നും ആവശ്യപ്പെട്ട് കോടതി കേന്ദ്രത്തിന് നോട്ടിസ് അയച്ചു. പാര്‍ലമെന്ററി തര്‍ക്കങ്ങളുടെ പേരില്‍ എത്രനാള്‍ ഹൈവേകള്‍ അടച്ചിടാനാകുമെന്നും ഇതിന് അവസാനം വേണ്ടേ എന്നും കോടതി ചോദിച്ചു.  

മുമ്പ് ഡല്‍ഹിയിലെത്താന്‍ 20 മിനുട്ട് സമയമെടുത്തിരുന്നുവെങ്കില്‍ ഇപ്പോഴത് രണ്ടു മണിക്കൂറായെന്ന് ഹരജിക്കാരി പരാതിപ്പെട്ടു. 

ഡല്‍ഹി അതിര്‍ത്തിയിലെ യു.പി ഗേറ്റിലെ സമരം ബുദ്ധിമുട്ടാകുന്നുവെന്നും ഹരജിക്കാരി ചൂണ്ടിക്കാട്ടി. 

വിഷയത്തില്‍ സര്‍ക്കാര്‍ നിലപാട് എന്താണെന്ന് കോടതി അഡിഷനല്‍ സോളിസിറ്റര്‍ ജനല്‍ കെ.എം നട്‌രാജിനോട്  ചോദിച്ചു. സമരം നടത്തുന്ന കര്‍ഷകരുമായി യോഗം വിളിച്ചിട്ടുണ്ടെന്നും ഇതിനുശേഷം സത്യവാങ്മൂലം സമര്‍പ്പിക്കാമെന്നും അദ്ദേഹം കോടതിയെ അറിയിച്ചു. നിയമങ്ങള്‍ എങ്ങനെ നടപ്പാക്കണമെന്നത് സര്‍ക്കാര്‍ തീരുമാനിക്കേണ്ട വിഷയമാണെന്നും കോടതിക്ക് നിയമ പാലന ചുമതലയില്ലെന്നും കോടതി പറഞ്ഞു. നിയമം നടപ്പാക്കേണ്ടത് സര്‍ക്കാര്‍ ചുമതലയാണെന്ന് സോളിസിറ്റര്‍ ജനറല്‍ തുഷാര്‍ മേത്തയും പറഞ്ഞു. മൂന്നംഗ ഉന്നതതല സമിതിയെ നിയോഗിച്ചിട്ടുണ്ടെന്നും ചര്‍ച്ചയ്ക്ക് വിളിച്ചിട്ടും കര്‍ഷകരുടെ പ്രതിനിധികള്‍ പ്രതികരിച്ചിട്ടില്ലെന്നും തുഷാര്‍ മേത്ത കോടതിയെ അറിയിച്ചു.