മലപ്പുറം: മുസ്ലിം ലീഗ് പോഷകസംഘടനകളില്‍ 20 ശതമാനം വനിതാ സംവരണം നടപ്പാക്കുമെന്ന് സംസ്ഥാന ആക്ടിങ് ജനറല്‍ സെക്രട്ടറി പി.എം.എ സലാം.

യൂത്ത് ലീഗും എംഎസ്എഫും അടക്കമുള്ള സംഘടനങ്ങളിലടക്കം സംവരണം ഏര്‍പ്പെടുത്തുമെന്നും വനിതാ പ്രാതിനിധ്യം വരുമ്പോള്‍ വേണ്ട ക്രമീകരണങ്ങള്‍ നടത്തുമെന്നും അദ്ദേഹം അറിയിച്ചു. മഞ്ചേരിയില്‍ നടന്ന സംസ്ഥാന പ്രവര്‍ത്തക സമിതി യോഗത്തിനു ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.

ഹരിത വിഷയം യോഗത്തില്‍ ചര്‍ച്ച ചെയ്തിട്ടില്ല. അതൊക്കെ കഴിഞ്ഞുപോയ കാര്യങ്ങളാണ്. വീണ്ടും അത് തുറക്കാന്‍ ശ്രമിച്ചാല്‍ നടക്കില്ല. യോഗത്തില്‍ ഒരു തരത്തിലുമുള്ള അപശബ്ദവും അപസ്വരവുമുണ്ടായില്ല. ഒറ്റക്കെട്ടായി പാര്‍ട്ടിയെ മുന്നോട്ടുകൊണ്ടുപോകാനാണ് യോഗത്തില്‍ തീരുമാനമായിട്ടുള്ളതെന്നും ലീഗില്‍ പ്രതിസന്ധിയില്ലെന്നും അദ്ദേഹം പറഞ്ഞു.