ഹരിതയുടെ പ്രവര്‍ത്തനം കാംപസുകളില്‍ മാത്രമാക്കും. പുതിയ അംഗത്വ കാംപയിന്‍ ആരംഭിക്കുന്നതോടെ ഹരിതയുടെ സംസ്ഥാന, ജില്ലാ കമ്മിറ്റികള്‍ പിരിച്ചുവിടും. ഇതിനു പകരമായി യൂത്ത് ലീഗ്, എം.എസ്.എഫ് കമ്മിറ്റികളില്‍ 20 ശതമാനം സ്ത്രീ സംവരണം ഉറപ്പാക്കും. നാലു മാസത്തിനകം പാര്‍ട്ടിയുടെ പുതിയ ജില്ലാ, സംസ്ഥാന കമ്മിറ്റികള്‍ പ്രഖ്യാപിക്കും. സംസ്ഥാന സെക്രട്ടേറിയറ്റിനെ ഭരണഘടനാനുസൃതമായി പുനഃക്രമീകരിക്കാനും തീരുമാനിച്ചു. പത്തംഗ സമിതി തയാറാക്കിയ നയരേഖയ്ക്ക് പ്രവര്‍ത്തകസമിതി അംഗീകാരം നല്‍കി. പാര്‍ട്ടിയുടെ നയനിലപാടുകളിലെ പാളിച്ചകള്‍ക്ക് പരിഹാരം കാണാന്‍ വിദഗ്ധരുമായി ആശയവിനിമയം നടത്തി നൂതനമായ കാഴ്ചപ്പാടുകള്‍ തേടും. പാര്‍ട്ടി പത്രത്തിന്റേതുള്‍പ്പെടെയുള്ള സാമ്പത്തിക വിഷയങ്ങള്‍ ആവര്‍ത്തിക്കാതിരിക്കാന്‍ സാമ്പത്തിക വീക്ഷണം സംബന്ധിച്ച് പഠനം നടത്താനും തീരുമാനമായി. അനാരോഗ്യം മൂലം സംസ്ഥാന പ്രസിഡന്റ് പാണക്കാട് സയ്യിദ് ഹൈദരലി ശിഹാബ് തങ്ങള്‍ യോഗത്തില്‍ പങ്കെടുത്തില്ല. സയ്യിദ് സാദിഖലി ശിഹാബ് തങ്ങളുടെ അധ്യക്ഷതയിലാണ് പ്രവര്‍ത്തകസമിതി ചേര്‍ന്നത്.