കണ്ണൂര്‍: ഓടിക്കൊണ്ടിരിക്കെ ആംബുലസന്‍സിന്റെ ടയര്‍ ഊരിത്തെറിച്ച് രണ്ടു ബൈക്ക് യാത്രികര്‍ക്കും ഒരു കാല്‍നട യാത്രികനും പരുക്ക്. ബൈക്ക് യാത്രക്കാരായ കീഴുന്നപ്പാറ സ്വദേശികളായ നൗഫല്‍(24), ശുഹൈബ്(26), വഴിയാത്രക്കാരന്‍ ചട്ടുകപ്പാറ സ്വദേശി ബാലകൃഷ്ണന്‍ എന്നിവര്‍ക്കാണ് പരുക്കേറ്റത്. ഇവരെ സ്‌പെഷാലിറ്റി ആശുപത്രിയില്‍ പ്രവേശിപ്പിച്ചു. ഇന്നലെ രാത്രി എട്ടോടെ താഴെചൊവ്വയിലായിരുന്നു അപകടം. പരിയാരം മെഡിക്കല്‍ കോളജില്‍ നിന്നു തലശ്ശേരിയിലേക്ക് പോവുകയായിരുന്ന ആംബുലന്‍സിന്റെ ടയറാണ് ഊരിത്തെറിച്ചത്. ട്രാഫിക് പൊലിസാണ് പരുക്കേറ്റവരെ ആശുപത്രിയിലെത്തിച്ചത്. സംഭവത്തെ തുടര്‍ന്ന് ദേശീയപാതയില്‍ അല്‍പനേരം ഗതാഗതം സ്തംഭിച്ചു.