അരുവിക്കരയില്‍ കെ.എസ്.ആര്‍.ടി.സി ബസും ബൈക്കും കൂട്ടിയിടിച്ച് രണ്ട് യുവാക്കള്‍ മരിച്ചു

തിരുവനന്തപുരം: തിരുവനന്തപുരം അരുവിക്കരയില്‍ കെ.എസ്.ആര്‍.ടി.സി. ബസും ബൈക്കും കൂട്ടിയിടിച്ച് രണ്ട് യുവാക്കള്‍ മരിച്ചു. അരുവിക്കര സ്വദേശികളും അയല്‍വാസികളുമായ ഷിബിന്‍ (18), നിധിന്‍ (21) എന്നിവരാണ് മരിച്ചത്. ഇന്ന് ഉച്ചയ്ക്ക് ഒന്നേമുക്കാലോടെ അരുവിക്കര പഴയ പൊലിസ് സ്റ്റേഷന് സമീപത്ത് വെച്ചായിരുന്നു അപകടം.

വെള്ളനാട്ടു നിന്ന് കിഴക്കേക്കോട്ടയിലേക്ക് പോയ ബസില്‍ നിയന്ത്രണം വിട്ടുവന്ന ബൈക്ക് ഇടിക്കുകയായിരുന്നു. ഇരുവരേയും മെഡിക്കല്‍ കോളജില്‍ എത്തിച്ചെങ്കിലും മരിച്ചിരുന്നു. ബൈക്കിലിടിച്ച ബസ് റോഡിന്റെ വശത്തള്ള ഓടയിലേക്ക് ചെരിഞ്ഞ് രണ്ട് യാത്രക്കാര്‍ക്ക് നിസാര പരുക്കേറ്റു.