ഗുവാഹത്തി: അസമിലെ കുടിയൊഴിപ്പിക്കലുമായി ബന്ധപ്പെട്ട് രണ്ടുപേര്‍ വെടിയേറ്റു മരിച്ച സംഭവത്തില്‍ രൂക്ഷ വിമര്‍ശനവുമായി ഗുവാഹത്തി ഹൈക്കോടതി. മണ്ണില്‍ രക്തം വീണെന്നും വന്‍ ദുരന്തമാണ് ഉണ്ടായതെന്നും കോടതി പറഞ്ഞു. അപ്രതീക്ഷിതമായ ദുരന്തമാണിത്.
കുറ്റക്കാര്‍ ആരായാലും ശിക്ഷിക്കുമെന്നും അക്കാര്യത്തില്‍ ആര്‍ക്കും സംശയം വേണ്ടെന്നും ചീഫ് ജസ്റ്റിസ് സുധാന്‍ഷു ധിലിയ, സൗമിത്ര സാകിയ എന്നിവര്‍ ഉള്‍പ്പെട്ട ഡിവിഷന്‍ ബെഞ്ച് പറഞ്ഞു.
ഈയിടെ നടന്ന കുടിയൊഴിപ്പിക്കലുമായി ബന്ധപ്പെട്ട് വിശദമായ സത്യവാങ്മൂലം സമര്‍പ്പിക്കാനും ഹൈക്കോടതി അസം സര്‍ക്കാരിന് നിര്‍ദേശം നല്‍കി.
ദറാജ് ജില്ലയില്‍ കുടിയൊഴിപ്പിക്കലിനിടെ വെടിയേറ്റു വീണയാളുടെ നെഞ്ചില്‍ ഫോട്ടോഗ്രാഫര്‍ ആഞ്ഞുചവിട്ടുന്ന ദൃശ്യങ്ങള്‍ പുറത്തുവന്നിരുന്നു. അസം പ്രതിപക്ഷ നേതാവ് ദെബാബരാത സെയ്കി നല്‍കിയ പൊതുതാല്‍പര്യ ഹരജി പരിഗണിക്കവെ, ദേശീയ പുനരധിവാസ നയം അസമില്‍ ബാധകമല്ലേ എന്ന് കോടതി ചോദിച്ചു. മൂന്നാഴ്ചയ്ക്കകം വിശദമായ സത്യവാങ്മൂലം അസം സര്‍ക്കാര്‍ സമര്‍പ്പിക്കണമെന്നും കോടതി പറഞ്ഞു. സെപ്റ്റംബര്‍ 23 നാണ് അസം കുടിയൊഴിപ്പിക്കലുമായി ബന്ധപ്പെട്ട് 12 കാരനുള്‍പ്പെടെ രണ്ടുപേര്‍ കൊല്ലപ്പെട്ടതും വെടിയേറ്റു വീണയാളുടെ നെഞ്ചില്‍ ഫോട്ടോഗ്രാഫര്‍ ചവിട്ടിയതും.