കൂറ്റനാട്: മൈനോറിറ്റി കോളജിലെ ഒന്നാം വര്‍ഷ വിദ്യാര്‍ഥിയെ ഒരു കൂട്ടം സീനിയര്‍ വിദ്യാര്‍ഥികള്‍ ചേര്‍ന്ന് റാഗ് ചെയ്തതായി പരാതി. ഒന്നാം വര്‍ഷ ബികോം വിദ്യാര്‍ഥിയായ മുഹമ്മദ് ഫായിസിനെയാണ് സീനിയര്‍ വിദ്യാര്‍ഥികള്‍ റാഗ് ചെയ്തത്. മര്‍ദനമേറ്റ ഫായിസ് പട്ടാമ്പിയിലെ സ്വകാര്യ ആശുപത്രിയില്‍ ചികിത്സയിലായിരുന്നു.
കഴിഞ്ഞ ചൊവ്വാഴ്ച ഉച്ചക്കാണ് സംഭവം. ഉച്ചഭക്ഷണം കഴിച്ച് ഫായിസും രണ്ടു സുഹൃത്തുക്കളും ക്ലാസിലേക്ക് വരുമ്പോള്‍ ഇരുപതോളം വരുന്ന രണ്ടാംവര്‍ഷ വിദ്യാര്‍ഥികള്‍ തടഞ്ഞു നിര്‍ത്തുകയും മറ്റു രണ്ടു പേരോടും ക്ലാസില്‍ പോകാന്‍ പറഞ്ഞതിനു ശേഷം തന്നെ തടഞ്ഞുവെച്ച് നിലത്തെ ചവറു പെറുക്കാന്‍ പറഞ്ഞതായി ഫായിസ് പറഞ്ഞു.
ക്ലാസുണ്ടന്നു പറഞ്ഞു പോകാന്‍ ശ്രമിച്ചപ്പോള്‍ കോളറിന് പിടിച്ചു വലിച്ചു. ചവറു പെറുക്കാന്‍ പറ്റില്ലന്നു പറഞ്ഞപ്പോള്‍ കൂട്ടം ചേര്‍ന്നു മര്‍ദിക്കുകയായിരുന്നന്നും ഫായിസ് പറഞ്ഞു. അടിയേറ്റു നിലത്തു വീണപ്പോള്‍ തലക്കും നടുവിനും ചവിട്ടി. മറ്റു വിദ്യാര്‍ഥികള്‍ ചേര്‍ന്നാണ് കോളജ് ഒഫിസില്‍ എത്തിച്ചത്.
സംഭവത്തെ തുടര്‍ന്ന് തൃത്താല പൊലിസ കോളജില്‍ എത്തി കേസെടുത്തു. അഞ്ചു വിദ്യാര്‍ഥികളെ കോളജില്‍ നിന്നും സസ്‌പെന്‍ഡ് ചെയ്തു.