'മുട്ട വറുക്കാനൊന്നും ഞങ്ങള്‍ക്ക് നേരമില്ല, ഞങ്ങള്‍ മെര്‍ക്കേവകളെ ഗ്രില്‍ ചെയ്യുന്ന തിരക്കിലാണ്' ഇസ്‌റാഈലിനെ പരിഹസിച്ച് ഹമാസ്

'മുട്ട പൊരിച്ചെടുക്കാന്‍ സമയമില്ല. ഞങ്ങളുടെ റെസിസ്റ്റന്‍സ് അംഗങ്ങള്‍ മെര്‍ക്കാവയെ ഗ്രില്‍ ചെയ്യുന്ന തിരക്കിലാണ്'. ഹമാസ് നേതാക്കള്‍ക്ക് വിലയിട്ട് കഴിഞ്ഞ ദിവസം ഇസ്‌റാഈല്‍ വ്യോവ സേന എറിഞ്ഞ ലഘുലേഖയെ പരിഹസിച്ച് പ്രതിരോധ സേന. ഇത്തരം നിസ്സാരമായ കാര്യങ്ങളൊന്നും തങ്ങള്‍ക്ക് ശ്രദ്ധിക്കാന്‍ നേരമില്ലെന്നും സയണിസ്റ്റ് സേനയെ തുരത്തുന്നതിന്റെ തിരക്കിലാണ് തങ്ങളെന്നും തുറന്നടിക്കുന്നതാണ് മറുപടി.

പ്രതിരോധ സേനയിലെ ചിലരെ കുറിച്ച് വിവരം നല്‍കുന്നവര്‍ക്ക് പ്രതിഫലം പ്രഖ്യാപിക്കുന്നതായിരുന്നു ലഘുലേഖ. 'ഗസ്സ മുനമ്പില്‍ നാശം വരുത്തുന്നവരെ' അറസ്റ്റ് ചെയ്യാന്‍ സഹായിക്കുന്നവര്‍ക്ക് വലിയ സംഖ്യകളാണ് പ്രതിഫലമായി സയണിസ്റ്റുകള്‍ വാഗ്ദാനം ചെയ്യുന്നത്. നേതാക്കന്‍മാരുടെ ചിത്രം ഉള്‍പെടെയാണ് നോട്ടിസ്. ഗസ്സയിലെ ഹമാസ് നേതാവ് യഹ്യ സിന്‍വാറിനെ കുറിതച്ച് വിവരം നല്‍കുന്നവര്‍ക്ക് നാല് ലക്ഷം ഡോളറാണ് വാഗ്ദാനം. സിന്‍വാറിന്റെ ഇളയ സഹോദരന്‍ മുഹമ്മദ്, ഖാന്‍ യൂനിസ് ബ്രിഗേഡ് തലവന്‍ റഫ സലാമ, അല്‍ ഖസ്സാം ബ്രിഗേഡ് തലവന്‍ മുഹമ്മദ് ദൈഫ് എന്നിവരെ കുറിച്ച് വിവരം നല്‍കുന്നവര്‍ക്കും പ്രതിഫലം പ്രഖ്യാപിച്ചിട്ടുണ്ട്.

ഹമാസിന് ശക്തി നഷ്ടപ്പെടുകയാണെന്നും ലഘുലേഖയില്‍ പറയുന്നു. അതിന്റെ നേതാക്കള്‍ക്ക് മുട്ട പൊരിക്കാന്‍ പോലും ശക്തിയില്ലെന്നും നോട്ടിസില്‍ പറയുന്നു.

'മുട്ട പൊരിച്ചെടുക്കാന്‍ സമയമില്ല. ഞങ്ങളുടെ റെസിസ്റ്റന്‍സ് അംഗങ്ങള്‍ മെര്‍ക്കാവയെ ഗ്രില്‍ ചെയ്യുന്ന തിരക്കിലാണ്' ഹമാസ് നേതാവ് ഇസ്സത്ത് അല്‍ റിഷേക്ക് ഇതിന് മറുപടി നല്‍കുന്നു.

വടക്കന്‍ ഗാസയുടെ നിയന്ത്രണം ഏറ്റെടുത്തതായി ഇസ്‌റാഈല്‍ സൈന്യം അവകാശപ്പെടുന്നത്. എന്നാല്‍ ഈ വാദം തെറ്റാണെന്നാണ് സമീപകാല സംഭവങ്ങള്‍ സൂചിപ്പിക്കുന്നത്.

സ്ട്രിപ്പില്‍ നടന്നുകൊണ്ടിരിക്കുന്ന ചെറുത്തുനില്‍പ്പുകള്‍ക്ക് നേതൃത്വം നല്‍കുന്ന സംഘത്തിന്റെ ഭൂരിഭാഗവും തങ്ങള്‍കീഴടക്കിയതായി ഇസ്‌റാഈല്‍ അവകാശപ്പെടുന്ന ഈ പ്രദേശങ്ങളിലാണ് ഇപ്പോഴും കേന്ദ്രീകരിച്ചിരിക്കുന്നത്.

മാത്രമല്ല ഗസ്സ മുനമ്പില്‍ ഉടനീളം ഇസ്‌റാഈല്‍ സൈന്യത്തിന് കനത്ത നഷ്ടം തുടരുകയാണ്. വ്യാഴാഴ്ച സൈന്യം പുറത്തുവിട്ട ഏറ്റവും പുതിയ ഔദ്യോഗിക കണക്കുകള്‍ പ്രകാരം, ഒക്ടോബര്‍ 7 മുതല്‍ 119 ഓഫിസര്‍മാര്‍ ഉള്‍പ്പെടെ കുറഞ്ഞത് 445 ഇസ്‌റാഈലി സൈനികര്‍ കൊല്ലപ്പെട്ടിട്ടുണ്ട്. ഇത് വളരെ വലിയ സംഖ്യാണെന്നാണ് ഫലസ്തീന്‍ പ്രതിരോധ സേന വിലയിരുത്തുന്നത്. കൂടാതെ ഹാറേസ് എന്ന ഇസ്‌റാഈലി മാധ്യമം പ്രസിദ്ധീകരിച്ച കണക്കനുസരിച്ച് ആയിരക്കണക്കിന് സൈനകരാണ് പരുക്കേറ്റ് കഴിയുന്നത്. പരുക്കേറ്റവരില്‍ പലരുടേയും നില ഗുരുതരമാണെന്നും ഇവര്‍ റിപ്പോര്‍ട്ട് ചെയ്യുന്നു. 500ലധികം ഇസ്‌റാഈല്‍ സൈനിക വാഹനങ്ങളും ഇതുവരെയായി ഹമാസ് നശിപ്പിച്ചിട്ടുണ്ട്. കഴിഞ്ഞ അഞ്ചുദിവസത്തിനുള്ളില്‍ മാത്രം നൂറിലേറെ വാഹനങ്ങള്‍ നശിപ്പിച്ചിട്ടുണ്ടെന്ന് അബുഉബൈദയുടെ പുതിയ പ്രസ്താവനയില്‍ പറയുന്നു.

മുഖ്യധാരാ മാധ്യമങ്ങളും പാശ്ചാതക്യ ശക്തികളും പൂര്‍ണ പിന്തുണ നല്‍കിയിട്ടും ലോകത്തില്‍ ഹമാസിന് സ്വീകാര്യത വര്‍ധിക്കുന്നതും ഇസ്‌റാഈലിന് എതിര്‍പ്പ് വര്‍ധിക്കുന്നതുമാണ് കാണുന്നത് എന്നതും സയണിസ്റ്റുകള്‍ നേരിടുന്ന തിരിച്ചടിയാണ്.