കോഴിക്കോട്: കെ. സുരേന്ദ്രന്‍ വിഭാഗത്തിന്റെ ഏകാധിപത്യത്തിനും വെട്ടിയൊതുക്കലിനുമെതിരേ ബി.ജെ.പിയില്‍ പൊട്ടിത്തെറി തുടരുന്നു. പാര്‍ട്ടിയിലെ ന്യൂനപക്ഷ മുഖമായിരുന്ന മധ്യമേഖലാ പ്രസിഡന്റ് എ.കെ നസീറിനെ സസ്‌പെന്‍ഡ് ചെയ്തതിനു പിന്നാലെ സംവിധായകന്‍ അലി അക്ബര്‍ സംസ്ഥാന കമ്മിറ്റി അംഗത്വം രാജിവച്ചു. 

ചില ആനുകാലിക സംഭവങ്ങള്‍ ഹൃദയത്തെ വേട്ടയാടിയെന്ന് അദ്ദേഹം ഫേസ്ബുക്കില്‍ കുറിച്ചു. സംഘ്പരിവാര്‍ നേതൃത്വത്തെ സന്തോഷിപ്പിച്ച് വ്യക്തിപരമായ നേട്ടങ്ങള്‍ക്കായി കടുത്ത വര്‍ഗീയതയായിരുന്നു അലി അക്ബര്‍ പ്രചരിപ്പിച്ചിരുന്നത്. സംഘ്പരിവാര്‍ നേതാക്കളെ വെല്ലുന്ന രീതിയിലായിരുന്നു അലി അക്ബറിന്റെ മുസ്‌ലിം വിരുദ്ധ പ്രചാരണങ്ങള്‍. മലബാര്‍ കലാപം വര്‍ഗീയ കലാപമായിരുന്നുവെന്ന സംഘ്പരിവാര്‍ വാദങ്ങള്‍ ഏറ്റെടുത്ത് '1921 പുഴ മുതല്‍ പുഴ വരെ' സിനിമയുടെ ചിത്രീകരണവും അദ്ദേഹം ആരംഭിച്ചു. 

സംഘ്പരിവാര്‍ പ്രവര്‍ത്തകരില്‍നിന്ന് പണം സമ്പാദിച്ചായിരുന്നു സിനിമയുടെ ചിത്രീകരണം. പ്രതീക്ഷിച്ചതു പോലെ പണം ലഭിക്കാത്തതിലുള്ള പ്രതിഷേധം അദ്ദേഹം പലപ്പോഴായി ഉയര്‍ത്തുകയും ചെയ്തിരുന്നു. താഹ ബാഫഖി തങ്ങളും ബി.ജെ.പിയില്‍ നിന്ന് രാജിവച്ചു. തന്റെ പേരും കുടുംബപ്പേരും വച്ച് ബി.ജെ.പി കച്ചവടതന്ത്രമാണ് നടത്തിയതെന്ന് ഇപ്പോള്‍ മനസിലാക്കുന്നുവെന്ന് അദ്ദേഹം പറഞ്ഞു.