തിരുവനന്തപുരം: നിയമസഭയിലെ ചോദ്യോത്തരവേളയില്‍ രാഷ്ട്രീയ ചോദ്യങ്ങള്‍ പാടില്ലെന്ന കര്‍ശന നിര്‍ദേശവുമായി സ്പീക്കര്‍ എം.ബി രാജേഷ്. 

ഇത് ചട്ടലംഘനമാണെന്നും പലവട്ടം ഇക്കാര്യം ശ്രദ്ധയില്‍പെടുത്തിയിട്ടും എം.എല്‍.എമാര്‍ ശ്രദ്ധിക്കുന്നില്ലെന്നും സ്പീക്കര്‍ പറഞ്ഞു. 

എന്നാല്‍ ഇക്കാര്യം ശ്രദ്ധിക്കേണ്ടത് നിയമസഭാ സെക്രട്ടേറിയറ്റാണെന്നും റൂള്‍സ് ഓഫ് പ്രോസീജ്യറിന് വിരുദ്ധമായ ചോദ്യങ്ങള്‍ അനുവദിക്കരുതെന്നും പ്രതിപക്ഷനേതാവ് വി.ഡി സതീശനും പറഞ്ഞു. സ്പീക്കര്‍ ഇതിനോട് യോജിച്ചു. 

 

നിയമസഭാ സെക്രട്ടേറിയറ്റിന് ഇത് സംബന്ധിച്ച് കര്‍ശന നിര്‍ദേശം നല്‍കിട്ടുണ്ടെന്നും വിശദമായ പരിശോധനയ്ക്കു ശേഷം മാത്രമേ ചോദ്യങ്ങള്‍ അനുവദിക്കൂ എന്നും ചോദ്യങ്ങള്‍ക്ക് അനുമതി നല്‍കിയില്ലെങ്കില്‍ ഇക്കാര്യം ബന്ധപ്പെട്ട എം.എല്‍.എയെ രേഖാമൂലം അറിയിക്കാന്‍ നിര്‍ദേശം നല്‍കിയിട്ടുണ്ടെന്നും സ്പീക്കര്‍ വ്യക്തമാക്കി.

പാര്‍ട്ടി ഫണ്ട് നല്‍കിയില്ലെങ്കില്‍ ഭൂമിയില്‍ കൊടികുത്തുമെന്ന് കൊല്ലം ചവറയിലെ സി.പി.എം നേതാവിന്റെ ഭീഷണി സംബന്ധിച്ച സജീവ് ജോസഫിന്റെ ചോദ്യം പരിഗണിക്കുന്നതിനിടെയായിരുന്നു സ്പീക്കറുടെ പരാമര്‍ശം. 

 

കഴിഞ്ഞദിവസം മുസ്‌ലിം ലീഗിന്റെ വനിതാ വിദ്യാര്‍ഥി വിഭാഗയായ ഹരിതയുമായി ബന്ധപ്പെട്ട ചോദ്യമുയര്‍ന്നപ്പോഴും സ്പീക്കര്‍ രാഷ്ട്രീയ ചോദ്യങ്ങള്‍ പാടില്ലെന്ന നിര്‍ദേശം നല്‍കിയിരുന്നു.