തിരുവനന്തപുരം: മലപ്പുറം ജില്ലാ സഹകരണ ബാങ്കിനെ കേരള ബാങ്കില്‍ ലയിപ്പിക്കാനുള്ള  2021ലെ കേരള സഹകരണ സംഘം (രണ്ടാം ഭേദഗതി) ബില്‍ നിയമസഭ സബ്ജക്ട് കമ്മിറ്റിക്കു വിട്ടു. 

ഇന്നലെ മന്ത്രി വി.എന്‍ വാസവനാണ് ബില്‍ അവതരിപ്പിച്ചത്. ഇതിനായുള്ള നിയമനിര്‍മാണം ജനാധിപത്യ അവകാശങ്ങളുടെ ലംഘനമാണെന്ന് പ്രതിപക്ഷം കുറ്റപ്പെടുത്തി. കേരള ബാങ്കില്‍ ലയിക്കേണ്ടതില്ലെന്ന് മലപ്പുറം ജില്ലാ സഹകരണ ബാങ്കിന്റെ ജനറല്‍ ബോഡി മൂന്നു പ്രാവശ്യം യോഗം ചേര്‍ന്ന് പ്രമേയം പാസാക്കിയതാണെന്ന് ബാങ്കിന്റെ പ്രസിഡന്റ് കൂടിയായ യു.എ ലത്തീഫ് ചൂണ്ടിക്കാട്ടി. മൂന്നാമത്തെ പ്രാവശ്യം ഐകകണ്‌ഠ്യേനയാണ് പ്രമേയം പാസാക്കിയത്. ഭരണഘടനാപരമായ അവകാശങ്ങളാണ് നിഷേധിക്കപ്പെടുന്നതെന്നും ലത്തീഫ് പറഞ്ഞു. നിരാകരണ പ്രമേയം അവതരിപ്പിച്ച കെ.പി.എ മജീദിന്റെ ചര്‍ച്ചകള്‍ വേണമെന്ന ആവശ്യം അംഗീകരിക്കുന്നതായി മന്ത്രി പറഞ്ഞു. 

ഏതു തരത്തിലുള്ള ചര്‍ച്ചകള്‍ക്കും സര്‍ക്കാര്‍ തയാറാണ്. സഹകരണ മേഖലയുമായി ബന്ധപ്പെട്ട സമ്പൂര്‍ണ നിയമഭേദഗതി അടുത്ത സമ്മേളനത്തില്‍ കൊണ്ടുവരും. ഇതിനു പുറമെ ക്ഷീര സഹകരണ സംഘങ്ങളില്‍ അംഗത്വം ലഭിക്കാനുള്ള പുതിയ വ്യവസ്ഥകളും ബില്ലില്‍ ഉള്‍പ്പെടുത്തിയിട്ടുണ്ട്. ക്ഷീര വികസന മേലയിലെ കടലാസ് സംഘങ്ങളെ ഒഴിവാക്കി യഥാര്‍ത്ഥ കര്‍ഷകരെ മുന്നോട്ടുകൊണ്ടുവരികയാണ് ലക്ഷ്യമെന്നും മന്ത്രി പറഞ്ഞു. ബില്‍ സംബന്ധിച്ച് യു.എ ലത്തീഫ്, എന്‍. ഷംസുദ്ദീന്‍ എന്നിവര്‍ ഉന്നയിച്ച തടസ്സവാദം സ്പീക്കര്‍ തള്ളി. 

മന്ത്രി കെ.രാധാകൃഷ്ണന്‍ അവതരിപ്പിച്ച 2021ലെ കേരള ദേവസ്വം റിക്രൂട്ട്‌മെന്റ് ബോര്‍ഡ് (ഭേദഗതി) ബില്ലും സബ്ജക്ട് കമ്മിറ്റിക്കു വിട്ടു. ദേവസ്വം റിക്രൂട്ട്‌മെന്റ് ബോര്‍ഡില്‍ ചെയര്‍മാനായും അംഗങ്ങളായും തെരഞ്ഞെടുക്കപ്പെടുന്നവര്‍ക്ക് പുനര്‍നിയമനം നല്‍കാന്‍ വ്യവസ്ഥ ചെയ്യുന്നതാണ് ബില്‍.