സ്വന്തം ലേഖകന്‍

കൊല്ലം: ഇന്ത്യന്‍ കുറ്റാന്വേഷണ ചരിത്രത്തിലെ തന്നെ ഏറ്റവും അപൂര്‍വതകള്‍ നിറഞ്ഞ കേസാണ് ഭിന്നശേഷിക്കാരിയായി ഭാര്യയെ സ്വത്തിനായി ഭര്‍ത്താവ് പാമ്പിനെ ഉപയോഗിച്ച് കൊലപ്പെടുത്തിയ അഞ്ചല്‍ ഉത്ര വധക്കേസ്. ദൃക്‌സാക്ഷികളില്ലാത്ത കേസ്, ശാസ്ത്രീയ തെളിവുകളെ മാത്രം ആശ്രയമാക്കി തെളിയിക്കുക. എന്നിങ്ങനെ പോകുന്നു കേസിന്റെ പ്രത്യേകതകള്‍. പാമ്പിനെ ഉപയോഗിച്ച് കൊലപാതകം നടത്തിയ ഇന്ത്യയിലെ മൂന്നാമത്തേയും കേരളത്തിലെ ആദ്യത്തേതും കേസെന്ന പ്രത്യേകതയും. നേരത്തെയുണ്ടായ കേസുകളില്‍ കുറ്റം തെളിയിക്കാന്‍ കഴിയാത്തതിനെത്തുടര്‍ന്ന് പ്രതികളെ വെറുതെ വിട്ടെങ്കില്‍, ഇവിടെ ശിക്ഷിച്ചു.

ജീവനുള്ള ഒരു വസ്തുവിനെ കൊലപാതകത്തിനുള്ള ആയുധമായി ഉപയോഗിച്ചു എന്നതാണ് ഉത്ര വധക്കേസിന്റെ ഏറ്റവും വലിയ സവിശേഷത. പ്രതിയായ സൂരജിന്റെ കുറ്റസമ്മത മൊഴിക്കപ്പുറം ഇക്കാര്യം ശാസ്ത്രീയമായി തെളിയിക്കാനായി പൊലിസ് സഞ്ചരിച്ച വഴികളും വ്യത്യസ്തമായിരുന്നു. മൂര്‍ഖന്‍ പാമ്പിനെ ഉപയോഗിച്ച് ഡമ്മി പരീക്ഷണമടക്കമുള്ള വേറിട്ട അന്വേഷണ രീതികളും ഏറെ ശ്രദ്ധിക്കപ്പെട്ടു. 

 ഒടുവില്‍ വിചാരണ ആരംഭിച്ചപ്പോള്‍ തുടക്കം മുതല്‍ താന്‍ നിരപരാധിയെന്ന അവകാശവാദമാണ് പ്രതി സൂരജ് കോടതിക്കു മുന്നില്‍ ഉയര്‍ത്തിയത്. എന്നാല്‍ ശാസ്ത്രീയ തെളിവുകളുടെ സമാഹരണത്തിലൂടെ സൂരജിന്റെ വാദങ്ങള്‍ പ്രോസിക്യൂഷന്‍ പൊളിച്ചു.  രാജ്യത്തെ കുറ്റാന്വേഷണ ചരിത്രത്തില്‍ തന്നെ സവിശേഷ പ്രധാന്യമുള്ള കേസായാണ് ഉത്രക്കേസ് ഇപ്പോള്‍ പരിഗണിക്കപ്പെടുന്നത്. ഐ.പി.എസ് ട്രെയിനിങ്ങിന്റെ ഭാഗമായി പഠിക്കാനുള്ള കേസുകളുടെ പട്ടികയില്‍ ഉത്ര വധക്കേസുണ്ട്. മൃഗങ്ങളെ ഉപയോഗിച്ചു കൊലപ്പെടുത്തുന്നതു സംബന്ധിച്ച് ഫോറന്‍സിക് സയന്‍സില്‍ പുതിയ പഠനത്തിന് കൂടി കേസ് വഴിതെളിച്ചു. പാമ്പ് സ്വാഭാവികമായി കടിക്കുമ്പോഴുള്ള പല്ലുകളുടെ അകലം, ബലപ്രയോഗത്തിലൂടെ കടിപ്പിക്കുമ്പോഴുള്ള പല്ലുകളുടെ അകലം. ശരീരത്തിലേക്ക് ഇറങ്ങുന്ന വിഷത്തിന്റെ അളവ് തുടങ്ങിയവ സംബന്ധിച്ചു വിവിധ ഇന്‍സ്റ്റിറ്റ്യൂട്ടുകള്‍ പഠനം തുടങ്ങി കഴിഞ്ഞെന്നും പൊലിസ് അറിയിച്ചു.