കല്‍പ്പറ്റ: ഭൂരഹിത ആദിവാസികള്‍ക്ക് ഭൂമി വാങ്ങി നല്‍കുന്നതിനായി നടപ്പാക്കിയ 'ആശിക്കും ഭൂമി ആദിവാസിക്ക് 'പദ്ധതിയില്‍ നടത്തിയ തട്ടിപ്പ് സംബന്ധിച്ച് സമഗ്ര അന്വേഷണം നടത്തണമെന്ന് സി.കെ ശശീന്ദ്രന്‍ എം.എല്‍.എ ആവശ്യപ്പെട്ടു. ഈ ആവശ്യമുന്നയിച്ച് മുഖ്യമന്ത്രി പിണറായി വിജയന് പരാതി നല്‍കി നല്‍കിയിട്ടുണ്ട്.
അരിവാള്‍ രോഗികള്‍ക്കുള്ള ഭൂമിയെടുപ്പ് സംബന്ധിച്ചും അന്വേഷിക്കണം. പദ്ധതികളില്‍ കോടികളുടെ അഴിമതിയാണ് നടത്തിയത്. തുച്ഛമായ വിലക്ക് വാസയോഗ്യമല്ലാത്ത ഭൂമി വാങ്ങിക്കൂട്ടി വന്‍ തുകക്ക് സര്‍ക്കാരിലേക്ക് നല്‍കുകയാണ് പലയിടത്തും ചെയ്തത്.
ഇതിന് പുറമെ സ്ഥലമുടമകളോട് കുറഞ്ഞ വില പറഞ്ഞുറപ്പിച്ച് ഇരട്ടിയിലേറെ തുക സര്‍ക്കാരില്‍ നിന്നും തട്ടിയെടുക്കുകയും ചെയ്തിട്ടുണ്ട്. പദ്ധതിയുടെ തുടക്കം മുതല്‍ ഇടപാടുകള്‍ സുതാര്യമാക്കണമെന്നും അഴിമതി മുക്തമാക്കണമെന്നും ആവശ്യപ്പെട്ടിരുന്നെങ്കിലും ചില ട്രൈബല്‍-റവന്യു ഉദ്യോഗസ്ഥരുടെ പിന്തുണയോടെ പദ്ധതി അട്ടിമറിക്കുകയായിരുന്നു. ആശിക്കും ഭൂമി പദ്ധതിയും അരിവാള്‍ രോഗികള്‍ക്ക് ഭൂമി വാങ്ങിയ പദ്ധതിയും പൂര്‍ണമായും പുന:പരിശോധനക്ക് വിധേയമാക്കണം. രേഖകള്‍ക്ക് പുറത്ത് അന്വേഷണം വ്യാപിപ്പിക്കണമെന്നും സി.കെ ശശീന്ദ്രന്‍ ആവശ്യപ്പെട്ടു.