ജനീവ: കൊവിഡ് വ്യാപനം ലോകത്ത് പതിറ്റാണ്ടുകള്‍ക്കു ശേഷം ആദ്യമായി ക്ഷയരോഗം (ടി.ബി) മൂലമുള്ള മരണം കൂടാനിടയാക്കിയതായി ലോകാരോഗ്യ സംഘടന. ക്ഷയരോഗത്തിനുള്ള മരുന്ന് രോഗികള്‍ക്ക് ലഭിക്കുന്നത് തടസപ്പെട്ടതാണ് കാരണം. ക്ഷയരോഗത്തിനെതിരേ ലോകം കൈവരിച്ച നേട്ടങ്ങള്‍ ഇല്ലാതാക്കുന്നതാണിത്.
ചികിത്സിച്ച് ഭേദമാക്കാവുന്ന ഈ രോഗം ആര്‍ക്കെല്ലാം ബാധിച്ചെന്ന് പരിശോധിക്കാനും ചികിത്സിക്കാനും കൂടുതല്‍ തുക അടിയന്തരമായി മാറ്റിവയ്‌ക്കേണ്ടതുണ്ടെന്ന് ഡബ്ല്യു.എച്ച്.ഒ മേധാവി ടെഡ്രോസ് അധാനം ഗബ്രിയേസസ് പറഞ്ഞു.
ലോകത്ത് പരിശോധനയ്ക്ക് വിധേയമാകാത്ത 41 ലക്ഷം ക്ഷയരോഗികളുണ്ടെന്നാണ് ലോകാരോഗ്യ സംഘടന കണക്കാക്കുന്നത്. 2019ല്‍ ഇത് 29 ലക്ഷമായിരുന്നു. കഴിഞ്ഞവര്‍ഷം രോഗികളുടെ എണ്ണം 21 ശതമാനം കുറഞ്ഞു. ക്ഷയരോഗം നേരിടുന്നതിനുള്ള തുക കൊവിഡ് ചികിത്സയിലേക്ക് മാറ്റി ചെലവഴിച്ചതാണ് പ്രതിസന്ധിയുണ്ടാക്കിയത്.
2020ല്‍ ടി.ബി ബാധിച്ച് 15 ലക്ഷം പേരാണ് മരിച്ചത്. ഇതില്‍ 2,14,000 പേരും എച്ച്.ഐ.വി പോസിറ്റീവായിരുന്നു. 2019ല്‍ 12 ലക്ഷം രോഗികളാണ് മരിച്ചത്.
ശ്വാസകോശത്തെ ബാധിക്കുന്ന ബാക്ടീരിയ രോഗമായ ടി.ബി ആഫ്രിക്കയിലെയും ഏഷ്യയിലെയും ദരിദ്ര രാജ്യങ്ങളിലാണ് കൂടുതലായി റിപ്പോര്‍ട്ട് ചെയ്യുന്നത്. ശരിയായ ചികിത്സ ലഭിച്ചാല്‍ 85 ശതമാനം രോഗികള്‍ക്കും ആറുമാസത്തിനകം ക്ഷയരോഗം സുഖപ്പെടും. എന്നാല്‍ ചികിത്സാ ഫണ്ട് ഇല്ലാത്തത് മരണനിരക്ക് കൂടാനിടയാകുമെന്ന ആശങ്ക ഉയര്‍ന്നിട്ടുണ്ട്.
2019ല്‍ ക്ഷയരോഗ ചികില്‍സയ്ക്ക് 580 കോടി ഡോളറാണ് ആഗോളതലത്തില്‍ ചെലവിട്ടത്. 2020ല്‍ 530 കോടി ഡോളറായി കുറഞ്ഞതായി 2020ലെ ടി.ബി വാര്‍ഷിക റിപ്പോര്‍ട്ടില്‍ പറയുന്നു.