യാത്രക്കാര്‍ ശ്രദ്ധിക്കുക!! താമരശേരി ചുരത്തില്‍ ഗതാഗത തടസം രൂക്ഷം; യാത്രക്കാര്‍ വെള്ളവും ലഘുഭക്ഷണവും കരുതണമെന്ന് പൊലിസ്

താമരശേരി: താമരശേരി ചുരം ആറാം വളവില്‍ ലോറി കുടുങ്ങിയതിനെത്തുടര്‍ന്ന് ഗതാഗത തടസം. വാഹനങ്ങളുടെ നീണ്ട നിര രണ്ടാംവളവുവരെ എത്തി. പുലര്‍ച്ചെ രണ്ടുമണിയോടെ ചരക്കു ലോറി ജോയിന്റ് പൊട്ടി കുടുങ്ങിയതോടെയാണ് ഗതാഗതക്കുരുക്കുണ്ടായത്. വീതി കുറഞ്ഞ ഭാഗത്താണ് ലോറി കുടുങ്ങിയതെന്നതിനാല്‍ ചെറിയ വാഹനങ്ങള്‍ക്ക് പോലും കഷ്ടിച്ചാണ് കടന്നുപോകാന്‍ കഴിയുന്നത്.

ചുരത്തില്‍ വാഹനങ്ങള്‍ക്ക് നീങ്ങാന്‍ കഴിയാതെ വന്നതോടെ വയനാട് ഭാഗത്തേക്ക് വൈത്തിരി വരെയും താഴെ ഈങ്ങാപ്പുഴക്ക് അടുത്ത് വരെയും വാഹനങ്ങളുടെ നീണ്ട നിരയാണ്. ശനിയാഴ്ച ചുരംവഴി യാത്ര ചെയ്യാനുള്ളവര്‍ ആവശ്യത്തിന് വെള്ളവും ലഘു ഭക്ഷണവും കരുതണമെന്നും വാഹനത്തില്‍ ഇന്ധനം ആവശ്യത്തിനു ഉണ്ട് എന്ന് ഉറപ്പുവരുത്തി മാത്രമേ ചുരത്തിലേക്ക് പ്രവേശിക്കാവൂ എന്നും ചുരം സംരക്ഷണ സമിതി പ്രവര്‍ത്തകരും പൊലിസും അറിയിച്ചു. ലൈന്‍ ട്രാഫിക് തെറ്റിച്ചുള്ള ഡ്രൈവിങ് നടത്തിയാല്‍ ഇവിടെവെച്ച് തന്നെ നടപടിയെടുക്കുമെന്നും പൊലിസ് അറിയിച്ചു.

ക്രിസ്മസ് അവധിയും പുതുവര്‍ഷവും പ്രമാണിച്ച് വയനാട്ടിലേക്ക് എത്തേണ്ട സഞ്ചാരികളും മറ്റു യാത്രക്കാരും വരും ദിവസങ്ങളില്‍ വര്‍ധിക്കുമെന്നതിനാല്‍ ഗതാഗതകുരുക്ക് തുടര്‍ക്കഥയാകാനാണ് സാധ്യത.