തൃശൂരില്‍ വീട്ടില്‍ കഞ്ചാവ് സംഘത്തിന്റെ അക്രമം

തൃശൂര്‍: തൃശൂരില്‍ കഞ്ചാവ് സംഘത്തിന്റെ പരാക്രമം. എരവിമംഗലം സ്വദേശി ചിറയത്ത് ഷാജുവിന്റെ വീട്ടിലാണ് അക്രമം ഉണ്ടായത്. വീടിന്റെ വാതില്‍ കുത്തിപ്പൊളിക്കാന്‍ അക്രമികള്‍ ശ്രമിച്ചു. സംഭവ സമയത്ത് വീട്ടുകാര്‍ സ്ഥലത്തില്ലായിരുന്നു.

വീട്ടിലെ കോഴികളുടെ കണ്ണ് കുത്തിപ്പൊട്ടിച്ചതായും, പുല്‍ക്കൂടില്‍ കുരിശ് സ്ഥാപിച്ചതായും നാട്ടുകാര്‍ പറയുന്നു. ഫിഷ് ടാങ്കില്‍ മണ്ണും കല്ലും നിറച്ചു, ടറസിന് മീതെയുള്ള സോളര്‍ പാനല്‍ അടിച്ചു തകര്‍ത്തു, ചെടി ചെട്ടികളും, വീടിന്റെ ശുചി മുറിയിലെ ടൈലുകളും നശിപ്പിച്ചു. ഗ്യാസ് സിലിണ്ടറുകള്‍ വലിച്ചെറിഞ്ഞ നിലയിലാണ് കണ്ടത്.

സംഭവം അറിഞ്ഞ് സ്ഥലത്തെത്തിയ നാട്ടുകാരാണ് ചില കുട്ടികള്‍ നടന്നു പോകുന്നത് കണ്ടതായി വിവരം നല്‍കിയത്. ഷാജുവിന്റെ വീട്ടിന്റെ പിന്‍ ഭാഗം പാടവും ചതുപ്പുമാണ്. ഇവിടെ ലഹരി സംഘം താവളമാക്കുന്നതായി പരാതി ഉണ്ടായിരുന്നു. ഷാജു വീട്ടില്‍ ക്യാമറ സ്ഥാപിച്ചിരുന്നു. ഇതാവാം വീടടിച്ചു തകര്‍ക്കാനുള്ള പ്രകോപനമായി സംശയിക്കുന്നത്. സംഭവത്തില്‍ ഒല്ലൂര്‍ പൊലിസ് അന്വേഷണം ആരംഭിച്ചു.