മുംബൈ: ബോളിവുഡ് നടന്‍ ഷാരൂഖ് ഖാന്റേയും നടി അനന്യ പാണ്ഡെയുടെയും വസതികളില്‍ നാര്‍ക്കോട്ടിക്‌സ് കണ്‍ട്രോള്‍ ബ്യൂറോ പരിശോധന. ഇരുവരുടേയും മുംബൈയിലെ വസതികളിലായിരുന്നു പരിശോധന. അനന്യയെ ചോദ്യം ചെയ്യുന്നതിനായി ഏജന്‍സി വിളിച്ചിട്ടുണ്ട്.

അതേസമയം, ആര്യന്‍ ഖാന്‍ പ്രതിയായ മയക്കുമരുന്ന് കേസുമായി ബന്ധപ്പെട്ടാണോ അനന്യയുടെ വീട്ടില്‍ പരിശോധന നടത്തിയതെന്ന് എന്‍.സി.ബി സംഘം വ്യക്തമാക്കിയിട്ടില്ല. അനന്യയും ആര്യന്‍ ഖാനും തമ്മിലുള്ള ചാറ്റുകള്‍ എന്‍.സി.ബി സംഘത്തിന് ലഭിച്ചിട്ടുണ്ടെന്ന വാര്‍ത്തകള്‍ പുറത്ത് വന്നിരുന്നു.

പ്പേര്‍ വര്‍ക്കുകള്‍ പൂര്‍ത്തിയാക്കുന്നതിന്റെ ഭാഗമായാണ് ഷാരൂഖ് ഖാന്റെ മന്നത്തില്‍ പോയതെന്നാണ് പൊലിസ് പറയുന്നത്.

ആഡംബര കപ്പലിലെ ലഹരിക്കേസുമായി ബന്ധപ്പെട്ട് ജയിലില്‍ കഴിയുന്ന മകന്‍ ആര്യന്‍ ഖാനെ ബോളിവുഡ് താരം ഷാരൂഖ് ഖാന്‍ സന്ദര്‍ശിച്ചിരുന്നു. ആര്‍തര്‍ റോഡ് ജയിലിലെത്തിയാണ് അദ്ദേഹം മകനെ കണ്ടത്. മകനെ കാണാന്‍ മിനിറ്റുകള്‍ മാത്രമാണ് ഷാരൂഖിന് അനുമതി നല്‍കിയിരുന്നത്. ആര്യനെ കണ്ട് ഉടന്‍തന്നെ താരം മടങ്ങുകയും ചെയ്തു.

ബുധനാഴ്ച ആര്യന് കോടതി ജാമ്യം നിഷേധിച്ചിരുന്നു. ചൊവ്വാഴ്ചയാണ് ആര്യന്‍ ഖാന്റെ ജാമ്യാപേക്ഷ ബോംബെ ഹൈകോടതി ഇനി പരിഗണിക്കുക.

ഒക്‌ടോബര്‍ മൂന്നിനാണ് 23കാരനായ ആര്യനെ നാര്‍കോട്ടിക്‌സ് കണ്‍ട്രോള്‍ ബ്യൂറോ അറസ്റ്റ് ചെയ്യുന്നത്. മൂന്നാഴ്ചയായി ജയിലിലാണ് ആര്യന്‍.