കോട്ടയത്ത് പാറക്കുളത്തില്‍ കാറിനുള്ളില്‍ യുവാവിന്റെ മൃതദേഹം; അന്വേഷണം

കോട്ടയം: കാണക്കാരിയില്‍ പാറക്കുളത്തില്‍ കാറിനുള്ളില്‍ മൃതദേഹം കണ്ടെത്തി. കുണ്ടൂക്കാല സ്വദേശി ലിജീഷ് ആണ് മരിച്ചത്. കാര്‍ നിയന്ത്രണം വിട്ട് കുളത്തിലേക്ക് വീണതാണെന്നാണ് പ്രാഥമിക നിഗമനം

ഇന്ന് രാവിലെയാണ് പ്രദേശവാസികള്‍ പാറക്കുളത്തില്‍ കാര്‍ കണ്ടെത്തിയത്. കാറിന്റെ ഒരു ഭാഗം വെള്ളത്തില്‍ ഉയര്‍ന്നു നില്‍ക്കുന്ന നിലയിലായിരുന്നു. കടുത്തുരുത്തി അഗ്നിരക്ഷാസേനയെത്തി മൃതദേഹം പുറത്തെടുത്തു.

കോട്ടയം മെഡിക്കല്‍ കോളേജിന് അടുത്ത് സ്ഥാപനം നടത്തുന്ന ലീജീഷ് ഇന്നലെ രാത്രി കടയടച്ച് വരുന്നതിനിടെയാണ് അപകടമുണ്ടായതെന്നാണ് സൂചന. കാര്‍ തെന്നി കുളത്തിലേക്ക് മറിഞ്ഞതിന്റെ പാടുകള്‍ പ്രദേശത്തു നിന്നും പൊലിസ് കണ്ടെത്തിയിട്ടുണ്ട്.

യുവാവിന്റെ മൃതദേഹം പോസ്റ്റുമോര്‍ട്ടത്തിനായി കോട്ടയം മെഡിക്കല്‍ കോളേജിലേക്ക് മാറ്റി.സംഭവത്തില്‍ അന്വേഷണം നടത്തുമെന്ന് പൊലിസ് അറിയിച്ചു.