ജലീല്‍ അരൂക്കുറ്റി

ആലപ്പുഴ: കെ.പി.സി.സി ഭാരവാഹിപ്പട്ടികയില്‍ പ്രധാന ഗ്രൂപ്പ് നേതാക്കളായ രമേശ് ചെന്നിത്തലയെയും ഉമ്മന്‍ചാണ്ടിയെയും പിന്നിലാക്കി കെ.സി വേണുഗോപാലിന് മേല്‍ക്കൈ.
23 ജനറല്‍ സെക്രട്ടറിമാരെ നിയമിച്ചതില്‍ എട്ടുപേരും നിര്‍വാഹകസമിതി അംഗങ്ങളില്‍ നല്ലൊരു ശതമാനവും കെ.സി വേണുഗോപാലിന്റെ വിശ്വസ്തര്‍. ചെന്നിത്തലയുടെയും വേണുഗോപാലിന്റെയും തട്ടകമായ ആലപ്പുഴയില്‍ നിന്നുള്ള ഭാരവാഹികളിലും കെ.സിക്ക് തന്നെയാണ് മേല്‍ക്കൈ. ജില്ലയില്‍ നിന്നുള്ള മൂന്ന് ജനറല്‍ സെക്രട്ടറിമാരില്‍ രണ്ടുപേരും കെ.സിയോട് അടുപ്പമുള്ളവരാണ്. ആലപ്പുഴ ഡി.സി.സി പ്രസിഡന്റായി ആദ്യപട്ടികയില്‍ പരിഗണിച്ച കെ.പി ശ്രീകുമാറിനെ സംസ്ഥാന സെക്രട്ടറിയില്‍ നിന്ന് ജനറല്‍ സെക്രട്ടറിയായി ഉയര്‍ത്തിയതും വേണുഗോപാലിന്റെ വിജയമാണ്.

ബി. ബാബുപ്രസാദിന് വേണ്ടി ചെന്നിത്തല നിലപാട് കടുപ്പിച്ചതോടെയാണ് കെ.പി ശ്രീകുമാര്‍ ഡി.സി.സി പ്രസിഡന്റ് പട്ടികയില്‍ നിന്ന് പുറത്തായത്. മറ്റൊരു വിശ്വസ്തനായ എം.ജെ ജോബിനെയും സംസ്ഥാന സെക്രട്ടറിയില്‍ നിന്ന് ജനറല്‍ സെക്രട്ടറിയായി വേണുഗോപാല്‍ ഉയര്‍ത്തി. മുന്‍ ജനറല്‍ സെക്രട്ടറി എ.എ ഷുക്കൂറിന്റെ സ്ഥാനം നിലനിര്‍ത്താന്‍ മാത്രമാണ് ചെന്നിത്തലയ്ക്ക് കഴിഞ്ഞത്. നേരത്തെ ആറ് ജനറല്‍ സെക്രട്ടറിമാരില്‍ നാലുപേരും ചെന്നിത്തലയുടെ അടുപ്പക്കാരായിരുന്നു. കെ.കെ എബ്രഹാം, പി.എം നിയാസ്, ദീപ്തിമേരി വര്‍ഗീസ്, ജോസി സെബാസ്റ്റ്യന്‍, പഴകുളം മധു, എം.എം നസീര്‍ എന്നിവരാണ് ജനറല്‍ സെക്രട്ടറിമാരായി ഇടംപിടിച്ച കെ.സിയുടെ മറ്റു വിശ്വസ്തര്‍.
ഭാരവാഹിപ്പട്ടികയില്‍ തിരിച്ചടിയായത് എ ഗ്രൂപ്പിനാണ്. ഐ ഗ്രൂപ്പ് പല നേതാക്കളുടെ പേരില്‍ ഭിന്നിച്ചുനിന്നാണെങ്കിലും കൂടുതല്‍ പദവികള്‍ നേടിയപ്പോള്‍ എ ഗ്രൂപ്പിന് ലഭിച്ചത് ആറ് ജനറല്‍ സെക്രട്ടറിമാരും രണ്ട് വൈസ് പ്രസിഡന്റുമാരും എട്ടു നിര്‍വാഹകസമിതി അംഗങ്ങളും ഉള്‍പ്പെടെ 18 പേരെ മാത്രം. മറ്റു നേതാക്കളുടെ അക്കൗണ്ടില്‍ ഭാരവാഹികളായവരില്‍ അധികവും പഴയ അടുപ്പക്കാരായതിനാല്‍ ചെന്നിത്തലയ്ക്ക് എതിര്‍ക്കാന്‍ കഴിയാത്ത അവസ്ഥയാണ്.