റിയാദ്: കാലാവസ്ഥാ വ്യതിയാനം മൂലം കഠിനമായ ചൂടില്‍ പശ്ചിമേഷ്യ വെന്തുരുകുന്നു. അതികഠിനമായ ചൂടിലേക്കാണ് വരുംവര്‍ഷങ്ങള്‍ എത്തുകയെന്ന മുന്നറിയിപ്പുമായാണ് കടുത്ത ചൂട് ഗള്‍ഫ് രാഷ്ട്രങ്ങളെ അസഹനീയമാക്കുന്നത്. സഊദി അറേബ്യ, ഇറാന്‍, ഇറാഖ്, കുവൈത്ത് എന്നീ രാജ്യങ്ങളിലാണ് ചൂട് ക്രമാതീതമായതെന്നു കണക്കുകള്‍ സൂചിപ്പിക്കുന്നു. ചൂട് താങ്ങാനാവാതെ ഇതിനകം നിരവധിപേര്‍ മരിച്ചു. നിര്‍ജലീകരണവും മറ്റു രോഗങ്ങളും മൂലം പലരും ആശുപത്രികളെ ആശ്രയിച്ചിട്ടുണ്ട്. കടുത്തചൂട് പ്രതിരോധിക്കാനാവാതെ ചൂട് കുറഞ്ഞ സ്ഥലങ്ങളിലേക്ക് പലരും മാറി താമസിക്കാനും തുടങ്ങിയിട്ടുണ്ട്. കാര്‍ഷിക വിളകളുടെ നശീകരണം മൂലം വിവിധ രാജ്യങ്ങളിലെ ആഭ്യന്തര ഉല്‍പ്പാദനം മുന്‍ വര്‍ഷങ്ങളെ അപേക്ഷിച്ചു 20 മുതല്‍ 30 ശതമാനം വരെ കുറവ് രേഖപ്പെടുത്തിയിട്ടുണ്ട്.
ചിലയിടങ്ങളില്‍ ചൂടിന് ചെറിയൊരു മാറ്റമുണ്ടെകിലും ഇനിയും ക്രമാതീതമായി ഉയരുമെന്നാണ്  കാലാവസ്ഥാ കേന്ദ്രങ്ങള്‍ നല്‍കുന്ന സൂചന.