വയനാട് പുതുവത്സരം ആഘോഷിക്കുന്നവരുടെ ശ്രദ്ധയ്ക്ക്; ചുരത്തിൽ നിയന്ത്രണം ഏർപ്പെടുത്തി പൊലിസ്

താമരശ്ശേരി: പുതുവർഷം ആഘോഷിക്കാൻ ഒരുങ്ങിയിരിക്കുകയാണ് നാടും നഗരവും. നിരവധി പേരാണ് വയനാടിന്റെ വശ്യതയിൽ പുതുവർഷത്തെ വരവേൽക്കാൻ ചുരം കയറുന്നത്. എന്നാൽ പുതുവർഷാഘോഷങ്ങൾ മുൻനിർത്തി താമരശ്ശേരി ചുരത്തിൽ പൊലിസ് ഇന്ന് രാത്രിയിൽ നിയന്ത്രണങ്ങൾ ഏർപ്പെടുത്തി.

ഞായറാഴ്ച വൈകുന്നേരം ആറ് മുതൽ പുലർച്ചെ അഞ്ച് മണി വരെ വലിയ വാഹനങ്ങൾക്ക് ചുരത്തിൽ നിയന്ത്രണം ഏർപ്പെടുത്തിയിട്ടുണ്ട്. ഈ സമയത്ത് ചുരത്തിൽ വാഹനങ്ങളുടെ പാർക്കിങ് അനുവദിക്കില്ല. വാഹനത്തിൽ നിന്ന് ചുരത്തിൽ ഇറങ്ങാൻ അനുവദിക്കില്ല. ചുരത്തിലെ കടകൾ രാത്രി ഏഴ് മണിയ്ക്ക് ശേഷം തുറക്കാൻ പാടില്ലെന്നും പൊലിസ് നിർദ്ദേശിച്ചു. നിയന്ത്രണ സമയത്ത് വാഹനങ്ങൾ ചുരത്തിൽ പാർക്ക് ചെയ്താൽ ഫൈൻ ഈടാക്കും.

താമരശ്ശേരി ചുരത്തിൽ ദിവസവും വാഹനങ്ങളുടെ ആധിക്യം കാരണം ഗതാഗതകുരുക്ക് പതിവാകുകയാണ്. ക്രിസ്മസ് പുതുവത്സരത്തെ തുടർന്ന് വിനോദ സഞ്ചാരികളുടെ ഒഴുക്ക് വർദ്ധിച്ചതും ചുരത്തിൽ വാഹന പെരുപ്പത്തിന് കാരണമാകുന്നുണ്ട്.