കോട്ടയം: ഭര്‍ത്താവിന് പിറന്നാള്‍ സമ്മാനം വാങ്ങാന്‍ പോകുന്ന വഴി ദമ്പതികള്‍ സഞ്ചരിച്ച സ്‌കൂട്ടര്‍ കണ്ടെയ്‌നര്‍ ലോറിയുമായി കൂട്ടിയിടിച്ച് യുവതിക്ക് ദാരുണാന്ത്യം. കോട്ടയം നീറികാട് കല്ലമ്പള്ളി കൊല്ലം കുഴിയില്‍ ബിനോയുടെ ഭാര്യ പ്രിയ ബിനോയി (48) ആണ് മരിച്ചത്. ഇന്ന് വൈകുന്നേരം ആറുമണിയോടെ കോട്ടയം നാഗമ്പടം പാലത്തിലാണ് അപകടം. അപകടത്തെ തുടര്‍ന്ന് ഉടന്‍ തന്നെ ഇരുവരെയും ആശുപത്രിയിലേക്ക് എത്തിച്ചുവെങ്കിലും അന്ത്യം സംഭവിക്കുകയായിരുന്നു.

ഇന്ന് ബിനോയിയുടെ പിറന്നാള്‍ ദിനമായതിനാല്‍ ഇരുവരും ചേര്‍ന്ന് സമ്മാനം വാങ്ങാനായി കോട്ടയം ടൗണിലേക്ക് വരുമ്പോഴാണ് അപകടമുണ്ടായത്. എംസി റോഡില്‍ കോട്ടയം നാഗമ്പടം പാലത്തിലേക്ക് കടക്കുമ്പോഴാണ് അപകടം നടന്നത്. ബിനോയി ഓടിച്ചിരുന്ന സ്‌കൂട്ടറില്‍ ലോറി തട്ടുകയായിരുന്നു. തുടര്‍ന്ന് റോഡിന് നടുവിലേക്ക് തലയിടിച്ച് വീണപ്പോഴുണ്ടായ ഗുരുതര പരിക്കാണ് മരണകാരണമായത്. ബിനോയി കാര്യമായ പരിക്കുകളില്ലാതെ രക്ഷപ്പെട്ടു.

പൊടി ഉല്‍പ്പന്നങ്ങളും സ്‌പൈസസും ഓട്ടോറിക്ഷയില്‍ എത്തിച്ച് ഹോള്‍സെയില്‍ വില്പന നടത്തുകയാണ് ബിനോയി. ഗംഗ (ഫാഷന്‍ ഡിസൈനര്‍), ഗായത്രി (10ാം ക്ലാസ്) എന്നിവര്‍ മക്കളാണ്. മൃതദേഹം കോട്ടയം മെഡിക്കല്‍ കോളേജ് ആശുപത്രി മോര്‍ച്ചയിലേക്ക് മാറ്റി.