കൊച്ചി: എറണാകുളം അങ്കമാലി അതിരൂപതയുടെ വിവാദ ഭൂമി വില്‍പ്പനയുമായി ബന്ധപ്പെട്ട് എന്‍ഫോഴ്‌സ്‌മെന്റ് ഡയറക്ടറേറ്റ്(ഇ.ഡി) അന്വേഷണം ആരംഭിച്ചു. കര്‍ദിനാള്‍ മാര്‍ ജോര്‍ജ് ആലഞ്ചേരി അടക്കം 24 പേരാണ് കേസിലെ പ്രതികള്‍. ഇടനിലക്കാരും ഭൂമി വാങ്ങിയവരും പ്രതിപ്പട്ടികയിലുണ്ട്. ആധാരം വിലകുറച്ചു കാണിച്ച് കോടികളുടെ ഇടപാട് നടത്തിയെന്നാണ് ഇ.ഡി കേസ്.
നികുതി വെട്ടിപ്പിന് ആദായനികുതി വകുപ്പ് സഭയ്ക്ക് 6.5 കോടി പിഴയിട്ടിരുന്നു. വിശ്വാസികളുടെ കൂട്ടായ്മയായ എ.എം.ടി ഭാരവാഹി പാപ്പച്ചന്‍ വര്‍ഗീസിന്റെ പരാതിയുടെ അടിസ്ഥാനത്തില്‍ പൊലിസ് രജിസ്റ്റര്‍ ചെയ്ത കേസ് പരിഗണിച്ചാണ് ഇ.ഡി ഇ.സി.ഐ.ആര്‍(എന്‍ഫോഴ്‌സ്‌മെന്റ് കേസ് ഇന്‍ഫര്‍മേഷന്‍ റിപ്പോര്‍ട്ട്) രജിസ്റ്റര്‍ ചെയ്തത്.

അന്വേഷണം പ്രാഥമിക ഘട്ടത്തിലാണെന്നും പൊലിസ് കേസില്‍ ഉള്‍പ്പെട്ട എല്ലാ പ്രതികളെയും ഇ.സി.ഐ.ആറിലും പ്രതികളാക്കിയിട്ടുണ്ടെന്നും ഇ.ഡി വൃത്തങ്ങള്‍ അറിയിച്ചു. ഇടപാടുകളില്‍ കള്ളപ്പണം വെളുപ്പിക്കല്‍ പോലുള്ള സാമ്പത്തിക ക്രമക്കേടുകള്‍ നടന്നിട്ടുണ്ടോയെന്ന് ഇ.ഡി അന്വേഷിക്കുന്നുണ്ട്. പൊലിസ് എഫ്.ഐ.ആറില്‍ പേരുള്ളവരില്‍ ആരെങ്കിലും ഇത്തരം കുറ്റകൃത്യങ്ങളില്‍ ഉള്‍പ്പെട്ടിട്ടില്ലെന്ന് കണ്ടെത്തിയാല്‍ അവരെ ഒഴിവാക്കുമെന്നും ഇ.ഡി ഉദ്യോഗസ്ഥര്‍ അറിയിച്ചു. 28ന് അന്വേഷണസംഘത്തിന് മുന്‍പാകെ മൊഴി നല്‍കാനും തെളിവ് ഹാജരാക്കാനും പരാതിക്കാരനായ പാപ്പച്ചന്‍ വര്‍ഗീസിനെ ഇ.ഡി വിളിപ്പിച്ചിട്ടുണ്ട്.

കേസുമായി ബന്ധപ്പെട്ട് ഇ.ഡി നേരത്തേയും പ്രാഥമിക അന്വേഷണം നടത്തിയിരുന്നു. വിവാദ ഭൂമി ഇടപാടുകളുമായി ബന്ധപ്പെട്ട കേസുകള്‍ റദ്ദാക്കാന്‍ കര്‍ദിനാള്‍ ജോര്‍ജ് ആലഞ്ചേരി സമര്‍പ്പിച്ച ഏഴ് ഹരജികള്‍ ഓഗസ്റ്റ് 12ന് കേരള ഹൈക്കോടതി തള്ളിയതിനെ തുടര്‍ന്നാണ് കേസ് രജിസ്റ്റര്‍ ചെയ്ത് അന്വേഷണം നടത്താന്‍ ഡയറക്ടറേറ്റ് തീരുമാനിച്ചത്. പാപ്പച്ചന്റെ പരാതിയുടെ അടിസ്ഥാനത്തില്‍ എറണാകുളം സെന്‍ട്രല്‍ പൊലിസ് രജിസ്റ്റര്‍ ചെയ്ത കേസ് പ്രകാരം അതിരൂപതയിലെ അന്നത്തെ ഫിനാന്‍സ് ഓഫീസര്‍ ഫാ. ജോഷി പുതുവ, സിന്‍സിലസ് മോണ്‍ സെബാസ്റ്റ്യന്‍ വടക്കുംപാടന്‍ എന്നിവരും പ്രതിപ്പട്ടികയിലുണ്ട്.