റോഹ്തക്: റിയോ ഒളിംപിക്‌സില്‍ ഇന്ത്യയുടെ അഭിമാനമായ സാക്ഷി മാലികിന് മംഗല്യം. വനിതകളുടെ ഗുസ്തിയില്‍ വെങ്കല മെഡല്‍ നേടിയ സാക്ഷി വിവാഹിതയാവുന്നതായി ബംഗാളി പത്രമാണ് റിപ്പോര്‍ട്ടു ചെയ്തത്. ഗുസ്തി താരമായ ഒരാളാണ് സാക്ഷിയെ വിവാഹം ചെയ്യാന്‍ പോകുന്നതെന്നും ആനന്ദ്ബസാര്‍ പത്രിക റിപ്പോര്‍ട്ട് ചെയ്തു. പത്രത്തിന് നല്‍കിയ അഭിമുഖത്തിലാണ് സാക്ഷി വിവാഹക്കാര്യം സൂചിപ്പിച്ചത്. എന്നാല്‍ വരന്റെ പേര് വെളിപ്പെടുത്തിയിട്ടില്ല. പേര് രഹസ്യമായിരിക്കട്ടെയെന്നും അദ്ദേഹം തനിക്ക് പൂര്‍ണ പിന്തുണ നല്‍കുന്നുണ്ടെന്നും സാക്ഷി പറഞ്ഞു. വിവാഹത്തിനുശേഷം തനിക്ക് അദ്ദേഹത്തിലൂടെ ലഭിക്കുക ഒരു നല്ല സുഹൃത്തിനെ കൂടിയായിരിക്കും. സാക്ഷി പറഞ്ഞു.  വിവാഹം 2020ലെ ടോക്യോ ഒളിംപിക്‌സിനെ ബാധിക്കില്ല.
വിവാഹത്തിനുശേഷവും ഗുസ്തിയില്‍ തുടരുമെന്നും സാക്ഷി പറഞ്ഞു. ഇരുപത്തിമൂന്നുകാരിയായ സാക്ഷി ഹരിയാന സ്വദേശിയാണ്.